Bag-ong natawo gi-hostage sa amahan sud sa hospital sa Cebu

Bag-ong natawo nga bata gi-hostage sa iyang amahan sud sa Vicente Sotto Memorial Medical Center (VSMMC) karong Miyerkules. Naabtan pa sa GMA news Cebu ang usa ka lalaki nga naggunit og usa ka bata nga gibitay sa bintana sa VSMMC. Daling niabot ang mga pulis aron luwason ang bata. Apan nagmakuli ang nang-hostage pagsanong sa hangyo nga kuhaon na ang bata gikan sa bintana. Ni-demand ang hostage-taker og mga sakop sa media. Gitugutan sa mga pulis nga makasud ang mga sakop sa media sa pediatrics ward diin nahitabo ang hostage taking. Gitunol dayon sa lalaki ang bata ngadto sa pulis nga nagpakaaron-ingnon nga nurse, dayon pasalamat sa media. Nahibaw-an nga kaugalingong anak sa suspek ang bata. Ang asawa niini naghilak nga naglingkod sa wheel chair. Nailhan ang nang-hostage nga si Edito Patiño, taga-Cotcot, Liloan ug usa ka mananagat. Gani naglisod pa ang mga pulis pagpasakay kaniya sa patrol car kay nagmakuli kini. Matod sa suspek, iyang gi-hostage ang kaugalingong anak kay way ikabayad sa hospital. Iyang nahuna-huna nga magpakamatay nalang unta kuyog sa iyang anak. Si Alicia, inahan sa bata, gipaubos sa cesarean operation sa ikalimang anak nila ni Edito. Giingong dunay dakong bayranan ug giawhag na silang pagawson sa VSMMC. Gikatahong tig-gamitan og illegal nga drugas si Edito ug nag-nervous breakdown kaadlawon ning Miyerkules. Sa laing bahin, wa pay tinong lakang nga himoon ang VSMMC batok kang Patiño. Gipatin-aw ni Dr. Maria Consuelo Malaga, oic chief of clinics sa hospital, nga wa pa siya masayod sa desisyon sa chief of hospital kon idayon ba ang pagpasaka og kaso batok sa suspek. Wa pa usab masayod ang hospital kon unsa kadako ang bayranan ni Patiño sa cesarean operations. Gi-admit sa VSMMC ang asawa sa suspek tungod sa referral sa Eversley Sanitarium Hospital. Gikinahanglang ihimugso ang bata pinaagi sa cesarean operations. Hinoon sa VSMMC, mokantidad ang operasyon gikan P2, 000 hangtod P5, 000. Wa pay labot ang bayranan sa operating room ug sa mga tambal human sa operasyon. - Balitang Bisdak