Fujiwhara effect: Bagyong 'Lando' babalik dahil kay ‘Mina’

May namumuong “relasyon" sa mga bagyong “Mina" at “Lando" na bihirang mangyari sa kondisyon ng panahon na kung tawagin ay “Fujiwhara effect." Sa pulong balitaan nitong Linggo, ipinaliwanag ni Prisco Nilo, pinuno ng Philippine Atmospheric Geophysical and Astronomical Services Administration (Pagasa), hinahatak ng pwersa ni “Mina" pabalik sa Philippine Area of Responsibility ang mas mahinang si “Lando. Inihalintulad ni Nilo ang Fujiwahara effect sa isang pares na nagsasayaw ng waltz. Ang nangyayari, kapag ‘yong isang bagyo ay kumilos halimbawa ng pa-hilaga si “Mina," si “Lando" naman, kikilos ng pa-timog. Ngayon pag si “Lando" ay kikilos ng pa-hilaga, si “Mina" ay kikilos ng pa-timog," ayon kay Nilo. Sa ganitong sitwasyon, sinabi ni Nilo na ang laging nasusunod ay ang mas malakas at dominanteng bagyo. “Si “Mina," kasi ang dominant dito… eto ‘yong stronger na typhoon. Gano’n palagi ‘yan sa Fujiwhara effect, kapag lumiko ‘yong dominant na typhoon, susunod ‘yong isa. Upon crossing Northern Luzon, “Mina" is expected to do a u-turn. Kaya susunod si “Lando". Tuloy-tuloy silang magsusunuran," idinagdag ni Nilo. Sinabi ni Nilo na huling naranasan ng Pilipinas ang Fujiwhara effect sampung taon na ang nakararaan. Sa artikulong nalathala sa USA Today, ipinaliwanag ang Fujiwhara effect na: “The Fujiwhara effect describes the rotation of two storms around each other. It's most common with tropical cyclones such as typhoons or hurricanes, but also occurs in other cases." Nakasaad pa na, “effect is thought to occur when storms get about 900 miles apart." “When Tropical Storm Iris was approaching the Windward Islands on Aug. 23, 1995 and Hurricane Humberto was close behind, they drew close enough together to begin a Fujiwhara dance," paliwanag nito. "As Humberto chased down Iris, Humberto began to lift northward over Iris while Iris slowed down and turned a bit to the south. Iris became a hurricane just as this "dance" began but both storms were weakened by their passion for each other," idinagdag pa sa artikulo.- GMANews.TV