Bata nga mikaon og 'imported' candy patay

Namatay ang usa ka Grade-2 pupil sa Langtad Elementary School, Cebu, niadtong Lunes pipila ka adlaw human giingong nikaon og "imported" candy. Giingong nikaon si Foensythia Missy Nietes, 8 anyos, og candy gikan sa laing nasud ug biskwit nga giputos lang sa tinfoil. Nagduda ang ginikanan sa bata nga food poisoning ang namatyan sa bata. Nakasaksi usab ang mga classmate ni Missy nga nikaon kini og napalit nga kendi ug biskwit nga gibaligya sa gawas sa tunghaan. Apan wala na ang mga sidewalk vendor nga gipalitan sa bata sa pagkaon dihang niduaw sa dapit ang Balitang Bisdak. Nabantayan sa class adviser nga nagluya na si Missy niadtong nilabayng semana, apan wa magdahum nga nahilo kini. Gihangyo na sa tunghaan ang mga opisyal sa barangay nga papahawaon na ang mga tigbaligya gawas sa tunghaan. Lakip sa ilang gipasidan-an mao ang mga tinun-an. - Balitang Bisdak