37 nga 'nalanag' sa macaroni, spaghetti luwas na

Luwas na sa makuyaw nga kahimtang ang 37 ka mga tawo nga gituuhang nangalanag sa gikaong macaroni ug spaghetti sa San Antonio, Cateel, Davao Oriental. Padayon pang gina-monitor sa Mati Provincial Hospital ang mga biktima apan gisegurong dili na delikado ang ilang kahimtang. Hangtod karon wala pa gihapon masayod si Criselda Basut, nga maoy nagluto sa spaghetti ug macaroni, kung nganong nagdaut sila human nangaon sa naasoyng mga pagkaon. Gikuhaan na sa Department of Health Region 11 og food sample ang maong spaghetti ug macaroni aron masusi kun unsay hinongdan sa pagkalanag sa mga nangaon niini. Ipadala sa kauluhana ang sample aron masuta kung tinood ang duda nga expired na ang mga sagol sa spaghetti ug macaroni, matod sa DOH-11. Hangtod karon wala pay kumpirmasyon ang DOH sa hinungdan sa hitabo. Magpadala ang ahensya og usa ka team aron manuki-duki sa lugar diin nahitabo ang giingong food poisoning. - Testigo