2 patay sa pag-atake sa Compostela Valley

Gipusil patay ang barangay kagawad sa Lebanon, Montevista, Compostela Valley sa gituuhang mga miyembro sa “sparrow" unit sa New People’s Army (NPA). Samtang naglingaw-lingaw sa usa ka videoke bar sa Lebanon, napatay si kagawad Noel Lintapan human girakrakan sa mga armadong gituuhang mga rebelde. Patay usab ang iyang bayaw nga babaye human napagan sa pagpmusil. Kuyog ni Lintapan ang iyang asawa ug mga paryente sa maong kalingawan. Gikatahong miyembro sa Citizen Armed Forces Geographical Unit (Cafgu) ang kagawad. Matud sa mga nakasaksi, kalit lang nga mipaarak sa ilang armas ang ubay-ubay nga armado nga nakapwesto sa ibabaw nga bahin sa lugar. Nagpailang mga NPA ang grupo nga tuyo mao ra ang pagpatay kang Lintapan. Si Evangeline Adlawan, bayaw sa kagawad, napagan ug gilayong nakabsan sa kinabuhi. Siyam ka mga anak ang gibiyaan sa biktima. Pipila lamang kuno ka metros gikan sa nahitabuan sa pag-atake ang nahimutangan sa detachment sa mga sundalo. Bisan sa kalisud sa dalan sa maong dapit, daling kunong nakaikyas ang mga suspek. Gikaingong ang Lebanon sakop sa area nga gilihukan sa Front Committee 33 sa mga NPA, diin babaye ang kumnader. Gialerto na ang mga pulis ug mga sundalo human sa insidente. Moabot og unom ka kilometros ang gilay-on sa Lebanon gikan sa sentro sa Montevista. Kaniadto halos wala nay tawo nga mupuyo ning lugar tungod sa presensya sa mga NPA. Karon, kontrolado na sa mga awtoridad ang lugar, apan ubay-ubay gihapon ang mga insidenteng pagpamanhig o pagpang-sparrow, diin si Lintapan ang pinakaulahing biktima. Padayon ang koordinasyon sa mga pulis ug mga sundalo sa pagpatuman sa mas hugot nga seguridad sa lugar. - Testigo