Citom mibasura sa traffic plan sa Banilad, Cebu

Gibasura na sa Cebu City traffic operations management (Citom) ang odd-even scheme sa Banilad Road taliwa sa padayon nga pagtukod sa Ban-tal flyover niining Biyernes. Nahukman sa Citom board nga ipadaplin na lang ang odd-even scheme kay pakyas kini pagpaluag sa trapiko sa Banilad Road. Subay niini, bukas na ang maong dan sa tanang motorista sugod sa pagtukod sa flyover. Nangagpas ang Citom sa paghuot unya sa trapiko sa karsada tungod kay duha lang ka lane ang magamit. Gitugutan lang sa Citom ang mga motorista nga manukad sa intersection sa Maria Luisa ug A.S. Fortuna nga maka-right turn. Mahimong mo-left turn ang mga motorista nga maggikan sa A.S. Fortuna og makalahos padung sa Maria Luisa. Aduna lang unyay itudlo nga u-turn slots sa matag lane ang Citom. Bisan kun gibasura ang odd-even scheme, ipakatap gihapon ang mga traffic enforcer sa Banilad, Talamban ug sa Mandaue City. Nanlantaw ang Citom nga daghan gihapong moagi sa alternative route aron makalihay sa kahuot sa trapiko sa Banilad Road. Subling niawhag ang Citom sa rehiyonal nga buhatan sa Department of Public Works and Highways (DPWH) nga sugdan na ang road widening sa Banilad Road. Apan gikinahanglan nga sugdan una sa DPWH Region 7 ang pagpakigsabot-sabut sa mga establisyamento ug sa mga molupyo sa maong dan. Nanginahanglan usab og dakong kantidad ang DPWH-7. Dugay nang miawhag ang Citom nga palapdan ang Banilad Road aron ma-andam kini sa pagtukod sa flyover. Makatabang sa DPWH-7 si Cebu City north District Congressman Raul del Mar sa paghangyo sa maapektuhang mga negosyante ug molupyo. Mokabat sa P50 milyones ang gigahin sa Kongreso alang sa acquisition of land alang sa katukoran sa flyover. - Balitang Bisdak