Kontratista ng Macapagal hi-way umaapela sa Sandigan

Hiniling sa Sandiganbayan ng kontratista na gumawa sa P1.1 bilyong President Diosdado Macapagal Boulevard na baligtarin ang nauna nitong desisyon sa kasong katiwalian na isinampa laban sa kanila ng Office of the Ombudsman. Sa inihaing motion for reconsideration, iginiit ni Jesusito D. Legaspi na dapat ibasura ng Sandiganbayan ang reklamo dahil hndi ito sakop ng kapangyarihan ng korte sapagkat hindi siya opisyal ng pamahalaan. Ang argumento ng kampo ni Legaspi, nagkasala ang Sandiganbayan ng “grave abuse of discretion" nang ideklara sa desisyon nito noong Pebrero 5 na ang pasya ng Supreme Court sa Henry Go vs. Sandiganbayan ay walang “binding effect" sa kasalukuyang kaso habang nirerebisa ng SC en banc ang desisyon nito. Una rito, sinabi ng Sandiganbayan na ang desisyon ng SC sa kaso ni Henry Go ay hindi pa pinal kaya hindi dapat gamitin sa kaso ni Legaspi. Sa kaso ni Henry Go, sinabi ng Special Third Division ng SC na ang isang pribadong indibidwal ay hindi maaaring isakdal sa paglabag sa “Section 3 (e) ng RA 3019 o the Anti-Graft Law as only subsections (b), (c), (d) and (k) applies against private persons." “It logically follows that said provision exclusively applies to public officers, and never to private individuals like herein accused Legaspi. The same holds true even if individuals are charged with being in conspiracy with public officers," sabi ng kampo ni Legaspi. Si Legaspi ay pangulo ng JD Legaspi Construction, na inakusahan na sangkot sa pagpapatong sa presyo ng PDMB ng P630 milyon kasama ang mga dating pinuno ng Public Estates Authority at government auditors. Kinasuhan din sina Carlos P. Doble, Frisco F. San Juan, Carmelita de Leon-Chan, Daniel T. Dayan, Salvardo P. Malbarosa, Leo V. Padilla, Elpidio G. Damaso, Ernest Frederick O. Villareal, Benjamin V. Cariño, Joemari D. Gerochi, Angelito M. Villanueva, Martin S. Sanciego, Jr., Rodolfo T. Tuazon, Manuel R. Betiña, Jr., Theron Victor V. Lacson, Jaime R. Millan, Bernardo T. Viray, Raphael Pochollo A. Zorilla, Ernesto L. Enriquez, Cristina Amposta-Mortel, Manuel E. de la Paz, Arturo S. Layug, Benilda E. Mendoza, Epifanio L. Pureza, Jose G. Capistrano, at Ma. Cecilia de la Rama. - Fidel Jimenez, GMANews.TV