Mga menor de edad miapil sa protest rally sa Sugbo

Dayag ang presensya sa mga bata sa gipahigayon nga interfaith rally bisan giawhag ang mga ginikanan sa dili pagpakuyog sa ilang mga anak sa maong kalihukan. Giawhag sa mga police ug sa Department of Social Welfare and Development Central Visayas (Region 7) ang mga ginikanan ug mga paryente nga dili ikuyog ang mga bata sa pagsalmot sa rally niadtong Biyernes. Apan bisan pa man sa awhag ug sa naglagiting nga kainit gipauban gihapon sa pipila ka mga ginikanan ang ilang mga menor de edad. Gani, ang ubang mga bata nibitbit pa og streamers nga nagpatik sa mga yangongo batok sa adminsitrasyon ni Presidente Gloria Arroyo. Usa ka 10-anyos wa makahibaw sa tuyo sa iyang pag-apil sa rally dihang gipangutana sa GMA News. Gani, ni-absent lang gyud kini sa klase. Gitudloan nalang kini sa iyang apuhan og unsay angay nga itubag. Mao usab ang gibuhat sa inahan sa usa ka 14-anyos dihang gipangutana. Gidepensahan ni Alvin Dizon, regional coordinator sa grupong Akbayan ang presensya sa mga bata sa rally. Matud niya, wala sila magdasig sa ilang mga sakop nga paapilon ang mga bata, apan adunay mga ginikanan nga way kabinlan sa ilan sa ilang mga anak. Nauna nang niluwat og pamahayag ang DSWD 7 nga susihon nila kun gipamugos ba ang mga menor de edad pagpakuyog sa rally. Kun masuta nga gipugos ang mga bata, basehan na kini sa kasong child abuse. Nipabarog nalang og temporary daycare center and DSWD 7 haduol sa Fuente Osmeña Oval diin gipahigayon ang rally aron kabinlan sa mga bata samtang nagprotesta ang ilang mga ginikanan. Bukas ang temporary daycare center hangtod nahuman ang interfaith rally mga alas-7 sa gabii. Mga social worker sa crisis intervention unit sa DSW maoy niduma sa center. Gi-andaman usab og mga kuna ang center alang sa mga masuso og mga libro ug duwaan aron kalingawan sa mga bata. Nakig-alayon na ang DSWD sa Cebuanos for Truth og Bayan Muna aron mapabilin ang kahapsay og kalinaw sa rally.- Balitang Bisdak