Coast guard misusi sa kadaut sa Marcelo Fernan Bridge

CEBU CITY, Philippines - Gisusi sa joint team sa Coast Guard, Navy ug Department of Public Works and Highways (DPWH) ang damage sa haligi sa Marcelo Fernan Bridge human mabag-iri og usa ka dakong barko niadtong Lunes sa gabii. Gisawom sa composite team sayo sa buntag niining Miyerkules ang haligi sa ikaduhang taytayan sa Mactan. Naglangkob sa grupo ang mga sakop sa special operation group sa coast guard district Central-Eastern Visayas, Philippine Navy special operation unit ug DPWH. Matud sa operation officer sa coast guard nga way nakitang depekto sa haligi sa taytayan ang mga frogmen nga nisawom sa dagat. Aron matino nga luwas ang paggamit sa taytayan, DPWH Region 7 mokuha og Japanese consultant nga maoy mohiling kon aduna bay nadaut sa haligi. Gusto lang maniguro sa DPWH 7 nga lig-on gihapon ang pundasyon sa 2nd Mactan-Mandaue bridge human madasmagi sa MT Damar, usa ka dakong international cargo vessel. Gipahibaw ni attorney Agustinito Hermoso, legal counsel sa DPWH 7, nga ang Kajima consultancy firm takus nga mosusi sa kahimtang karon sa Tulay. Ang Japanese firm mao usab ang technical consultant sa Mactan-Cebu Bridge Management Board (MCBMB) dihang gitukod kining tulay niadtong 1999. Gihulagway nga lig-on ang pagkatukod sa taytayan kay makabarog kini bisan pa kon ang gikusgon sa linog moabut sa intensity 10. Mopada og demand letter ang MCBMB sa nanag-iya sa barko nga abagahon ang tanang gastos sa pakisusi sa coast guard ug sa consultancy fee sa Kajima. - Balitang Bisdak