Rape at pag-video sa Pinay OFW sa Saudi 'di totoo - DFA

MANILA – Binawi umano ng isang babaeng overseas Filipino workers ang kanyang kwento na ginahasa siya ng kanyang amo kasama ang tatlong iba pa, at kinunan ng video sa Al-Qatief, Saudi Arabia, ayon sa pahayag ng Foreign Affairs Department nitong Huwebes. Ang “panggagahasa" sa hindi pinangalanang OFW ay unang ipinaabot sa media ng OFW group na Migrante International na nakabase sa Middle East at sinundan naman ng pahayag ni Sen. Loren Legarda. Ayon sa pahayag ng DFA, nakauwi sa Pilipinas ang “biktima" nitong Miyerkules at inamin na “gawa-gawa" lamang niya ang kanyang kwento upang makuha ang atensyon ng pamahalaan para makauwi kaagad sa bansa. Nakasaad din umano sa pahayag ng “biktima" na binayaran siya ng kanyang amo na nagkakahalaga ng 6,700 riyals, at nagpaabot ng pasasalamat sa ibinigay na tulong ng embahada. Napag-alaman na kaagad nagpadala ng kinatawan ng embahada si Philippine Ambassador to Saudi Arabia Antonio Villamor sa Al-Qatief —700 kilometero mula sa Riyadh – upang imbestigahan ang ulat tungkol sa “biktima." Nakipag-ugnayan umano ang opisyal ng embahada sa pulisya ng Al-Qatief upang ipatawag ang amo ng OFW noong Mayo 26 para alamin ang kaso. Matapos malaman ang katotohanan, pumayag ang amo ng “biktima" na pauwian ang OFW at sinagot ang gastos sa kanyang repatriation. Pinuri naman ni Foreign Affairs Secretary Alberto Romulo si Villamor at mga tauhan nito sa mabilis at atensyon na ibinigay sa kaso ng “biktima." Una rito, sinabi ni Legarda na ang “biktima" ay isang Ifugao na naninirahan sa Quirino. Sa mga email na natanggap ng GMANews.TV, ilang OFWs sa Middle East ang nagpahayag ng pagkadismaya sa kaso ng “biktima." Nangangamba sila na magkaroon ng masamang epekto ang nangyari sa Al-Qatief sa mga OFW na totoong magiging biktima ng pang-aabuso. - Fidel Jimenez, GMANews.TV