Ombudsman gipa-report bahin sa car smuggling

CEBU CITY, Philippines - Gimanduan sa House Committee of Good Government ang Ombudsman Visayas nga mohatag og report sa gihimo niining imbestigasyon sa reklamo nga grabing car smuggling sa Sugbo. Gipatapos na sa Kongreso ang inquiry sa car smuggling sa siyudad ug ubang dapit sa nasud. Pakyas sila pagkuha'g mga ebidensya aron itumbok ang mga negosyanteng giingong nalambigit sa car smuggling. Tungod niini, ang ombudsman Visayas nalang ang giawhag sa komitiba aron mohatag og dugang katin-awan sa isyu. Gusto niining mahibaw-an ang dagan sa gihimong pakisusi. Ang Ombudsman Visayas dunay gihimong imbestigasyon base sa reklamo sa Cebu Auto Dealers Association nga dunay grabing car smuggling sa nasud nga gipasagdan lang sa Bureau of Customs, labi na sa Sugbo. Gipahibawo hinoon ni assistant ombudsman Santiago nga andam silang mohatag og report bahin niini. Wa hinoon niya ibutyag unsay unod sa report. - Bailitang Bisdak