Kylie Padilla at Andrea Torres, sa pagtatapos ng 'BetCin': 'Sobrang nakatataba ng puso na nagustuhan ninyo'
Sa pagtatapos ng BetCin, kapwa nagpapasalamat sina Kylie Padilla at Andrea Torres sa umaapaw na suportang natatanggap nila para sa serye, lalo na sa kanilang mga tagahanga, ang "Umamis."
Sa Instagram, ibinahagi ni Andrea kung gaano siya ka-proud na ginawa ang proyektong ito kasama si Kylie.
"[BetCin] finale on WeTV Philippines. Congratulations Babe [Kylie Padilla]! I am so proud of this project," pagbabahagi ni Andrea.
Ipinarating din ni Kylie ang pag-aasam niya na magkaraoon ng season two ang eight-episode series.
"I just wanna say thank you. Thank you for the support para sa 'BetCin.' Sobrang nakatataba ng puso na nagustuhan n'yo ang kuwento nina Beth at Cindy," pagbabahagi ni Kylie.
"I want a season two para mabawi ko si Beth, 'yung karakter ni Beth. Sana magka-season two talaga," dagdag ni Kylie.
Ipinalabas noong November 19 ang finale episode ng BetCin kung saan napanood ang pagtatapat nina Beth (Kylie) at Cindy (Andrea) sa kanilang mga tagahanga tungkol sa tunay na estado ng kanilang relasyon.
Sa BetCin, gumaganap bilang online influencers at same sex couple sina Kylie at Andrea na piniling itago ang katotohanan sa kanilang mga tagahanga na hiwalay na sila. Ito ay sa pag-aasam na mapanalunan ang P10 million na cash prize sa isang online contest na "#Relationship Goals."
Samantala, balikan ang sweetest photos nina Kylie Padilla at Andrea Torres sa gallery na ito: