Binalikan nina SB19 members Josh at Stell ang kanilang fanboy moments nang makilala at makakuwentuhan pa ang grupong BTS sa isang dance competition noon sa South Korea.
Sa Star Bites report ni Nelson Canlas sa GTV "Balitanghali" nitong Huwebes, sinabing lumaban sina Josh at Stell sa dance competition kung saan guest ang K-pop group.
"Dance competition together with Stell po sa old group po namin... Nakakuwentuhan at nakasama," kuwento ni Josh.
"Nakapagpa-picture pa po," dagdag naman kay Stell.
Parehong nominado ang SB19 at BTS sa Top Social Artist category ng Billboard Music Awards 2021.
May teaser ang SB19 ng kanilang upcoming single na ire-release sa ika-16 ng Mayo, matapos ang tagumpay ng single nilang "What?"
"#SB19Saan" ang caption nito na may larawan ng world map. —Jamil Santos/LBG, GMA News
