Naglabas ng pahayag nitong Biyernes ang Sparkle GMA Artist Center bilang suporta kay Mikee Quintos, na kabilang ngayon sa mga housemate sa "Pinoy Big Brother: Collab Edition 3.0."

Ayon sa talent management agency, napansin nila ang mga malisyoso at mapanirang pag-atake laban kay Mikee mula sa ilang grupo ng fans at tao, kabilang ang mga account na pinaghihinalaang magkakaugnay sa pagsasagawa ng online harassment.

"Let this serve as a stern warning: Sparkle will not tolerate the deliberate use of social media platforms against any of our artists and will not hesitate to file the appropriate criminal charges," saad ng Sparkle.

"We are closely monitoring these activities and documenting the posts, comments, and accounts involved," dagdag nito.

Ayon sa Sparkle, nirerespeto nito ang, "healthy competition, differing opinions, and the freedom of fans to support their chosen artists" pero naninindigan din ang ahensiya sa adbokasiya nito na, "Click Kindness."

"We encourage everyone to uplift their idols without the deliberate tearing down of others."

Pumasok si Mikee sa Bahay ni Kuya noong premiere night ng PBB Collab 3.0, Oktubre 24.

Mapapanood ang programa sa GMA Network tuwing Lunes hanggang Biyernes, 9:35 p.m.; Sabado, 6:15 p.m.; at Linggo, 4:55 p.m. —FRJ GMA News