Mas exciting para kay Christian Bautista ang pagpasok ng 2023, na nagsisilbing kaniyang ika-20 anibersaryo sa showbiz. Kaya naman pinaghahandaan na niya ang kaniyang concert sa Enero.
Sa Chika Minute report ni Cata Tibayan sa "24 Oras" nitong Miyerkoles, sinabing ipinagpapasalamat ni Christian ngayong 2022 ang malakas na pangangatawan at nakakapiling niya ang mga kaibigan at mahal sa buhay.
Bukod dito, sunod-sunod din ang kaniyang singing gigs sa Pilipinas at abroad.
Paniwala ng Asia's Romantic Balladeer, magiging exciting ang 2023 para sa lahat.
Pinaghahandaan na ni Christian ang kaniyang thanksgiving concert na The Way You Look at Me sa Samsung Performing Arts Theater sa Makati City sa Enero 28.
"We're gonna obviously reminisce through my music in the past 20 years. Hopefully some of my friends from the past 20 years in the industry will be able to go as well para we can connect and reconnect as well," sabi ni Christian.
"Most importantly it's a thanksgiving also for the fans," dagdag niya.
Magtatanghal din si Christian sa Indonesia sa Pebrero para sa Valentine's Day dahil malaking parte rin ang kaniyang fans abroad.
Samantala, mataas ang expectations ni Christian para sa nagbabalik na The Clash Season 5. —Jamil Santos/VBL, GMA Integrated News
