Nagbabala ang Philippine Overseas Employment Administration (POEA) sa mga licensed recruitment agency laban sa maagang pagkuha ng mga caregiver at care assistants para sa Technical Intern Training Program ng Japan.
Sa isang pahayag, nagpalabas ng direktiba si POEA administrator Bernard Olalia para sa mga recruitment agency na itigil ang maaagang pagkuha ng mga aplikante.
Ayon sa opisyal, nakatanggap sila ng mga impormasyon na ilang licensed Philippine recruitment agency ang nangangalap at nagpoproseso na ng aplikasyon kahit may naunang direktiba ang POEA laban sa premature recruitment, kabilang ang manpower pooling para sa nabanggit na trabaho sa Japan.
“Until the appropriate guidelines are issued by his office, all recruitment agencies are being directed to desist from the unauthorized recruitment. Otherwise, the Administration will be constrained to initiate the appropriate administrative action for violation of the 2016 Revised POEA Rules and Regulations Governing the Recruitment and Employment of Land-based Overseas Filipino Workers of 2016 in relation to POEA Memorandum Circular No. 1, Series of 2017, this Advisory, and other pertinent issuances relating thereto, and the corresponding criminal action for illegal recruitment,” sabi ni Olalia.
Nanawagan si Olalia sa publiko na ipagbigay-alam sa POEA ang mga illegal recruitment activities na isinasagawa maging ng ilang licensed agency at iba pa.-- FRJ, GMA News
