Tumanggi ang law professor na si Ralph Sarmiento na tumestigo bilang witness para sa defense team ni Vice President Sara Duterte sa kaniyang impeachment trial.
Sa isang video na nai-post sa Facebook, ipinunto ni Sarmiento na kailangang mapanatili ang kaniyang kalayaan at kawalang-kinikilingan bilang constitutional law expert.
"I have decided to decline participation as a witness in the proceedings. This is a personal decision to preserve the independence of my constitutional law scholarship and the impartiality of my legal views and opinions," sabi ni Sarmiento sa kaniyang post.
Sinabi ni Sarmiento na nakipag-ugnayan na siya sa defense team ni Duterte para hilingin ang pagbawi ng kahilingan nitong subpoena para sa kaniyang pagharap sa impeachment court ng Senado.
Kung mayroon nang nailabas na subpoena, hiniling niya sa defense team na bawiin ito.
Pinasalamatan pa rin ni Sarmiento ang defense team sa pagkilala sa kahalagahan ng mga pananaw sa konstitusyon at legal na ibinahagi niya sa social media.
Gayunpaman, ipinunto niya na hindi niya inaasahan na maaaring maging bahagi ng mga proseso ng impeachment ang kaniyang mga opinyon.
Inilista ng defense team ni Duterte si Sarmiento bilang unang saksi nito sa mga hindi maipaliwanag na kaso ng kayamanan laban sa bise presidente.
Bilang tugon, sinabi ng defense counsel na si Michael Poa na nirerespeto nila ang desisyon ng law professor.
“We respect Dean Sarmiento’s personal decision and appreciate his initial consideration of our invitation. We wish him well in his continued contributions to constitutional discourse,” sabi ni Poa.
Noong Miyerkoles, naghain ang defense team ng kahilingan para sa isang subpoena sa korte ng impeachment ng Senado, kung saan inaasahang haharap si Sarmiento sa witness stand sa Nobyembre 9.
Si Sarmiento ay isang propesor ng political and constitutional law sa University of St. La Salle College of Law. Dati rin siyang nagsilbi bilang vice chancellor para sa administrasyon ng unibersidad.
Nauna na siyang nanawagan para sa patas na pagdinig sa impeachment trial ni Duterte kasunod ng desisyon ng prosekusyon na ibasura ang tatlo sa apat na kaso laban sa bise presidente. — VBL GMA News