Hinikayat ng Manila Electric Company (Meralco) ang masusing pagtalakay sa panukala ni Pangulong Ferdinand “Bongbong” Marcos Jr. na alisin ang system loss charge sa electric bills ng mga konsumer, kasabay ng panawagang isaalang-alang ang posibleng epekto nito sa operasyon at pinansyal na katatagan ng mga power distribution utility.
Sa isang pahayag nitong Martes, sinabi ni Meralco Executive Vice President at Chief Operating Officer Ronnie Aperocho na bagama’t nirerespeto ng kompanya ang direksyon ng patakaran ni Marcos, nagbabala ito na maaaring magkaroon ng epekto sa industriya ng kuryente ang panukalang pag-alis sa system loss charge.
“It is important to recognize that system loss is not unique to any distribution utility but is a common operational aspect of the delivery of electricity — which affects the entire power industry,” sabi ni Aperocho.
Sa kaniyang ikalimang State of the Nation Address (SONA) noong Lunes, sinabi ni Marcos na panahon nang ihinto ang pagpapasa sa mga konsumer ng system loss charge at ng kaakibat nitong value-added tax (VAT).
Kasabay nito, nanawagan siya sa mga mambabatas na amyendahan ang Republic Act No. 9136 o ang Electric Power Industry Reform Act (EPIRA).
Tumutukoy ang system loss sa kuryenteng nawawala sa proseso ng transmission at distribution dahil sa mga teknikal na dahilan o ilegal na gawain gaya ng paggamit ng mga “jumper” at pagnanakaw ng kuryente.
Pinahihintulutan ng mga umiiral na batas, kabilang ang EPIRA at Republic Act No. 7832 o ang Anti-Pilferage of Electricity and Theft of Electric Transmission Lines/Materials Act, ang mga distribution utility na mabawi mula sa mga end-consumer ang bahagi ng system loss sa pamamagitan ng system loss charge na nakapaloob sa buwanang singil sa kuryente.
Sinabi ni Aperocho na aktibong makikilahok ang Meralco sa mga talakayan habang dinidinig ang mga panukalang amyenda sa EPIRA.
“We look forward to productive discussions which we hope will carefully consider the impact of reforms on the operations and sustainability of distribution utilities,” aniya.
“To ensure real benefits to consumers, these reforms should also support the ability of distribution utilities and electric cooperatives to efficiently operate, invest in infrastructure and system resilience, and deliver safe and stable electricity service,” dagdag pa niya.
Batay sa talaan ng mga singil ng Meralco, ang system loss charge ay isang ipinapasang singil (pass-through charge) na hindi direktang napupunta sa kompanya at bumubuo sa humigit-kumulang 5% ng buwanang bayarin sa kuryente ng mga kostumer nito.
“While distribution utilities like Meralco continue to invest in modernizing and upgrading facilities and deploying technologies that reduce system losses, a certain level of technical losses remains inherent in operating an electric distribution system,” sabi ni Aperocho.
“For Meralco’s part, we have consistently invested in system loss management initiatives, network modernization, and operational efficiencies — which enable us to maintain our system loss well below the 6.5% cap set by the ERC,” dagdag niya.
Sinabi ni Aperocho na patuloy na makikipagtulungan ang Meralco sa gobyerno, mga regulator, mambabatas, at iba pang stakeholder sa industriya sa pagsusulong ng mga repormang magpapalakas sa proteksyon ng mga konsumer at sa industriya ng kuryente. — MCG GMA News
