Sa kabila ng patuloy na babala ng Canada sa kanilang mga kababayan tungkol sa panganib sa pagpunta sa Mindanao, dalawang lalawigan na dating kasama sa listahan ng kanilang travel restrictions ang kanilang inalis.
Sa updated travel advisory noong May 1, inalis ng Canada ang Camiguin at Dinagat Islands sa listahan ng travel restriction sa Mindanao makaraang suriin ang security status sa dalawang lugar.
Ibinaba naman ng Canada sa “Avoid non-essential travel” category ang Bukidnon at Misamis Oriental, na naunang kasama sa “Avoid all travel” category noong nakaraang Enero.
Pinapaalalahan ng Canada ang kanilang mga kababayan sa pagpunta sa Mindanao dahil umano sa banta ng terorismo, mataas na antas ng krimen, at mga sagupaan ng mga rebelde at Philippine security forces sa ilang lugar sa rehiyon.
Kabilang pa rin sa mga lalawigan na ipinapayo ng Canada na dapat iwasang puntahan ng kanilang mga kababayan ay ang Cotabato, Basilan, Lanao del Sur, Lanao del Norte, Maguindanao, Misamis Occidental, Sarangani, South Cotabato, Sultan Kudarat, Sulu, Tawi-Tawi, Zamboanga del Norte, Zamboanga del Sur, at Zamboanga Sibugay.
“Extremists have been active in the southern Philippines for several years,” ayon sa abiso ng Canadian.
“Although local authorities have demobilized some of violent extremist groups in the recent years, there's still a risk of terrorist attacks and kidnappings, especially in the following regions: Bangsamoro Autonomous Region in Muslim Mindanao, Zamboanga Peninsula, Sulu archipelago,” dagdag nito,
Maliban sa Davao City at Siargao Island, pinapayuhan ang mga Canadian sa “non-essential travel” sa Central at Eastern Mindanao, dahil sa security risks gaya ng: Agusan del Norte, Agusan del Sur, Bukidnon, Davao de Oro, Davao del Norte, Davao del Sur, Davao Occidental, Davao Oriental, Misamis Oriental, Surigao del Norte, at Surigao del Sur.
Kung pupunta ang kanilang mga kababayan sa nabanggit na mga lalawigan, pinayuhan sila na, “remain indoors as much as possible, be aware of your surroundings at all times, avoid crowded places, and always travel with identification.”
“Expect an increased security presence in public areas, especially around malls and transportation hubs, stop at security checkpoints, monitor local media, (and) follow the advice and instructions of local authorities,” sabi pa sa abiso.
“There's a risk of being in the wrong place at the wrong time. The government of Canada's ability to provide consular assistance is limited if you get stranded in this area,” dagdag nito. —FRJ, GMA Integrated News
