Nagwagi si Jeyrick Sigmaton, o mas kilala bilang si "Carrot Man," bilang best actor for short film sa International Film Festival Manhattan Autumn 2021 sa New York.
Bumida si Jeyrick sa maikling pelikula na "Dayas," tampok ang buhay ng small-scale miners sa Itogon, Benguet. Idinerek at isinulat ito ng Cordilleran director na si Jianlin Floresca at produced ng Sine Cordillera at Be Unrivaled Productions.
"We're very thankful to have the best actor award for Jeyrick Sigmaton. So in behalf of my actor and the entire cast of Sine Cordillera 'Dayas,' and also in behalf of all Igorots all over the world, bagi tayo daytoy (sa ating lahat ito)," sabi ni direk Jianlin sa kaniyang pasasalamat sa film festival.
Matatandaang pinagkaguluhan ng netizens noon ang mala-heartthrob na mga larawan ni Jeyrick ng Kadaclan, Mountain Province, habang nagbubuhat ng mga carrot.—AOL, GMA News
