Nagtapos sa mas mababang antas ang financial market ng bansa nitong Lunes, kasabay ng pagbaba ng benchmark stock index at paghina ng piso laban sa dolyar. Ang mga namumuhunan, sinusuri ang datos na nagpapakitang mas mabagal kaysa inaasahan ang naging paglago ng ekonomiya.
Bumaba ng 25.5 sentimos ang halaga ng piso at nagsara sa P63.31 kada dolyar, mula sa P63.055 kada dolyar noong nakaraang Biyernes. Ito na ang ikatlong sunod na araw ng paghina muli ng piso.
“The US dollar/peso exchange rate corrected higher… after softer-than-expected local GDP growth at 2.1%,” pahayag ni Rizal Commercial Banking Corp. (RCBC) chief economist Michael Ricafort sa isang mobile message.
Naitala sa 2.1% ang paglago ng ekonomiya ng bansa sa ikatlong quarter ng taon. Ito ang pinakamabagal na paglago mula nang makaranas ng 3.8% contraction o pag-urong ang ekonomiya noong unang quarter ng 2021 na kasagsagan ng COVID-19 pandemic.
Inaasahan ni Ricafort na maglalaro ang halaga ng piso sa pagitan ng P63.20 at P62.45 kada dolyar sa Martes, Nobyembre 10, habang nasa P62.75 hanggang P63.00 ang susunod na support level nito.
Nagtala rin ng pagbaba ang local stock market. Bumagsak ng 84.03 puntos o 1.46% ang Philippine Stock Exchange index (PSEi) sa 5,677.92. Samantala, bumaba naman ng 34.79 puntos o 1.08% ang mas malawak na All Shares index sa 3,183.52.
Umabot sa mahigit 822.337 milyong shares na nagkakahalaga ng P5.978 bilyon ang naipagpalit sa merkado.
Mas marami ang mga stock na bumaba ang halaga kaysa sa mga tumaas sa bilang na 100 laban sa 74. Habang 69 na stocks naman ang hindi nagbago ang halaga. –FRJ GMA News