Itinalaga ni Pangulong Rodrigo Duterte si dating Bureau of Customs (BOC) commissioner Nicanor Faeldon bilang bagong director general ng Bureau of Corrections (BuCor), ayon kay Justice Secretary Menardo Guevarra.
Kasalukuyang deputy administrator ng Office of Civil Defense si Faeldon, na papalit kay Ronald "Bato" Dela Rosa bilang pinuno ng BuCor.
Iiwan ni Dela Rosa ang BuCor para tumakbong senador sa 2019 midterm elections.
"The DOJ has interposed no objections to the proposed appointment of Mr. Faeldon, and is now seeking the favorable endorsement of the Civil Service Commission as part of the requirements under the Bureau of Corrections Act of 2013," sabi ni Guevarra sa text message sa mga mamamahayag nitong Biyernes.
Nagbitiw si Faeldon sa kaniyang posisyon bilang pinuno ng BOC noong nakaraang taon matapos ang kontrobersiya sa nakapuslit na shabu mula sa China na kinalaunan ay nasabat sa isang bodega sa Valenzuela City.
Nadetine pa si Faeldon sa Senado dahil sa pagtanggi niya na tumestigo sa isinasagawang imbestigasyon ng Senate blue ribbon committee kaugnay sa nakapuslit na droga na nagkakahalaga ng P6.4-bilyon.
Pero noong Nobyembre, inabsuwelto ng Department of Justice si Faeldon sa naturang kontrobersiya.
Inirekomenda naman ang pagsasampa ng kaso laban sa Customs broker na si Mark Ruben Taguba II, shipment consignee Eirene Mae Tatad at iba pang isinasangkot sa naturang transakyso, kabilang ang ilang Chinese at Taiwanese nationals.
Nakabinbin ang kaso sa Manila Regional Trial Court.— FRJ, GMA News
