Hindi isinama ng Trump administration ang $336 million assistance para sa modernisasyon ng Philippine security forces mula sa ipinatutupad na foreign aid freeze ng Amerika, ayon kay Philippine Ambassador to the United States Jose Manuel Romualdez.
Nitong Lunes, "yes" ang naging tugon ni Romualdez nang tanungin ng GMA News Online kung natanggap na nila ang kompirmasyon ng US government tungkol sa naturang exemption na ibinigay sa Pilipinas.
Ayon kay Romualdez, bahagi ang naturang halaga sa $500 million foreign military financing o FMF na inaprubahan ng US Congress noong nakaraang taon sa ilalim ng Biden administration.
''We are pleased with this development after we worked on getting this exemption. This is another significant sign that our strong partnership and alliance with the United States remains intact with the new Trump administration,'' saad ni Romualdez, na sinabing susunod na ang iba pang pondo.
Layunin ng $500-million na tulong ng dating Biden administration na palakasin ang defense capability ng Pilipinas, sa harap ng pagiging mas agresibo ng China sa South China Sea, kabilang sa West Philippine Sea.
“Both countries are committed to the treaty alliance and to efforts to further strengthen our defense cooperation and interoperability. We will continue to engage the U.S. government on the importance of our bilateral work in supporting our shared goals and priorities,” saad ni Foreign Affairs spokesperson Teresita Daza sa isang pahayag.
Una rito, ipinatigil ng US State Department nitong Enero ang lahat ng foreign assistance habang nirerepaso ang sistema nito, batay sa utos ni Pres. Trump.
Kasunod nito, nakipag-usap si Romualdez kay US Secretary of State Marco Rubio, tungkol sa usapin ng tulong ng US sa Pilipinas.
Muling idineklara ni Rubio ang “iron-clad” commitment ng US sa Pilipinas, na matagal na nilang kaalyado sa Asya.— FRJ, GMA Integrated News
