Inihain sa Kamara de Representantes ang panukalang batas para ibalik ang parusang kamatayan o bitay sa mga mapatutunayang gumawa ng karumal-dumal na krimen.
Ayon sa may-akda ng House Bill 1543 na si Surigao del Norte Representative Robert Ace Barbers, dapat nang ibalik ang capital punishment sa bansa para matakot ang kriminal.
"Crimes disturb the order of society. The death penalty is said to be the strongest deterrent society has against such crimes. It aims to restore order and adequately punishes criminals," saad ni Barbers sa explanatory note ng panukala.
"The death penalty also serves as retribution for victims and their families," dagdag pa niya.
Giit ni Barbers, dapat gumawa ng paraan ang pamahalaan para mapigilan ang paggawa ng karumal-dumal na krimen. Aniya, ang pinakamabigat na parusa ang makapipigil nito--ang death penalty.
"If criminals charged guilty of committing heinous crimes are sentenced to death and executed, potential criminals will think twice before committing crimes for fear of losing their own life. In view of the foregoing consideration, the passage of this bill is earnestly sought," hiling ng mambabatas.
"We should elevate this [proposal] to national conversation to get the sentiment of the people and those sectors vulnerable to these crimes," patuloy niya.
Gayunman, sinabi ni Marikina Representative Stella Quimbo, na hindi dapat maging anti-poor kung maaprubahan ang pagbabalik ng parusang kamatayan.
"Kung magiging batas ito, dapat hindi maging anti-poor dahil ang mga mahihirap nating kababayan ay walang access sa magandang depensa. Baka ang mangyari eh in the end, puwede silang maging biktima ng hindi tamang pamamalakad," sabi ni Quimbo sa pulong balitaan.
"It is an empirical question, iba iba ang data, depende sa lugar, kikilatisin natin ang mga datos na ito," dagdag ni Quimbo.
Inalis ang death penalty noong 1987, at ibinalik noong 1993. Pero muling ibinasura ang parusang kamatayan noong 2006.— FRJ, GMA News
