Pinuri ni Beauty Gonzalez ang kaniyang leading man na si Dingdong Dantes dahil sa pagiging kalmado nito sa tuwing makararamdam sila ng pressure sa set ng "I Can See You: AlterNate."
Sa At Home with GMA Regional TV, inilarawan ni Beauty kung paano makatrabaho ang Kapuso Primetime King.
"Super easy breezy. Sobrang bait niyang tao. He makes sure that everyone is easy lang, hindi siya mayabang sa set... Siguro ang advice na nakuha ko sa kaniya is chill," sabi ni Beauty.
Pag-amin ni Beauty, hindi niya maiiwasan minsan na maging overthinker sa trabaho.
"Overthinker kasi ako eh, like... I mean you know, ewan ko, sakit siguro ng lahat ng babae 'yan," saad niya.
Kaya naman pinapayuhan siya ni Dingdong na mag-"chill" lang.
"Minsan sinasabi niya sa akin, 'Chill.' 'Yun ang pina-practice ko. Actually the start of the month 'yun ang ginagawa ko lang the whole month, chill," ayon pa sa aktres.
Gayunman, sinabi ni Beauty na kakaibang hamon para sa kaniya ang mini-series na "AlterNate" na matatapos na ngayong linggo.
"Of course kasi siyempre I'm working with the Primetime King. The show itself, asks really a lot from us actors. Sobrang hirap to do a dual character, especially for Mr. Dingdong. Also as co-actors, kailangan makita rin ng tao na iba-iba... Siyempre pagdating kay Nate, iba 'yung reaksyon namin. 'Pagdating kay Michael iba rin 'yun," ayon sa Kapuso actress.
Sa kuwento ng mini series, gumaganap si Dingdong bilang si Nate, na inampon at inaruga ng isang mayamang mag-asawa.
Ngunit madidiskubre niyang mayroon siyang kambal na si Michael, na si Dingdong din ang gumaganap.
Ginagampanan ni Beauty ang role ni Shiela na asawa ni Nate, pero mapapalapit din kay Michael.
"Si Shiela, different kasi in a way na I'm dealing with two brothers with the same face, 'yun ang number one difference," aniya.
"What will you do when you're stuck in a marraige na ayaw mo na, and here comes someone that you like? So it's hard to portray that role na hindi ka magmukhang maraming boys or unfaithful wife," sabi pa ni Beauty.
Si Dion Ignacio ang nagsilbing ka-double ni Dingdong para sa kambal na role nito.
--FRJ, GMA News
