Binalikan ng komedyanteng si Romeo Pastrana, o mas kilala bilang si Dagul, kung paano siya natuklasan sa showbiz, at kung sino ang nagbigay sa kaniya ng sikat niyang screenname.

Sa kaniyang nakaraang guesting sa “Kay Susan Tayo! Vlogs,” ikinuwento ni Dagul, na taga-Bacolod, na taong 1998 nang magpunta siya sa Maynila.

Pakay lamang ni Dagul noon na mamili ng mga paninda sa Baclaran, saka niya ito iuuwi sa probinsya.

Ngunit aksidenteng nagkayayaan sila noon ng kaniyang asawa na manood ng isang noontime show.

“So accidentally, nagyayaan na manood ng noontime show . Pagkatapos, nu’ng bumaba kami, ang nakita mo, mga artista, picture-picture agad. Nakita ko du’n si Sir Willie (Revillame) sa kabilang dressing room. Sabi ko, ‘Puwede magpa-picture?’ Nag-picture kami.”

“Sabi niya, ‘Oy, si Randy (Santiago). Randy, nandiyan sa kabilang dressing room.’ Pagsilip ko, nandu’n si Ara Mina saka si Sir Randy. Tapos sabi ko, ‘Sir, puwede magpa-picture?’ Ayun, nagpa-picture kami,’” pagpapatuloy niya.

Matapos ang show, nagsiuwian na rin ang mga artista. Ngunit sa sandaling iyon nagsimula ang career ni Dagul sa showbiz.

“Umalis na si ano, si Sir Randy. Pag-alis niya, biglang bumalik. Sabi niya, ‘Gusto mo mag-artista?’ Ayun.”

Kauumpisa pa lamang noon ng “Kool Ka Lang” sa Kapuso Network.

“Sabi niya, ‘Puwede ka kay Raymart (Santiago). Puwede ka du’n.’ Pero doon ka, sa GMA ka,” pag-alala ni Dagul na sinabi sa kaniya ni Randy.

“Sa GMA talaga ako nagsimula. 1998. Dapat kasi, ma'am Susan, si Sir Randy, ang director ng Kool Ka Lang,” kuwento niya.

Nang mapanood sa Kool Ka lang, nakasama na ni Dagul sina Raymart, Joey Marquez, Gloria Diaz, Bonel Balingit at Blakdyak.

Ibinahagi ni Dagul kung sino ang nagbansag sa kaniya ng pangalang “Dagul.”

“Ang Dagul, diyan sa Kool Ka Lang, si Ma'am Redgie Magno, ang ano namin dati,” saad niya.

“Pagdating ko kasi, ma'am Susan, sabi ni Ma'am Redgie, ‘O, paano yan? Kukunin ka na. Ang pangalan mo dito, ‘Dagul.’ Sabi ko, ‘Sige po. Opo.”

“Excited din ako eh. Biro mo ha, ma'am. Hindi ko naisip ‘yun. Sa isang daan na isipin mo, hindi ko naisip ‘yan. Kahit isa lang na magiging ganiyan ako,” dagdag niya. – FRJ GMA News