Bumaba ang trust at performance ratings nitong Marso ni Pangulong Ferdinand “Bongbong” Marcos Jr., habang tumaas naman si Vice President Sara Duterte, batay sa survey ng Pulse Asia Research.
Ayon sa Pulse Asia, 17 porsiyento ang ibinaba ng approval rating ni Marcos [o mga nasisiyahan sa trabaho ng pangulo] na mula 42% noong Pebrero ay naging 25% nitong Marso.
Nadagdagan naman ng 21% ang kaniyang disapproval rating na nasa 53%.
Naitala ang naturang pagbaba sa approval rating ni Marcos sa National Capital Region (24%), Balanced Luzon (-20), Mindanao (-14), at Visayas (-10).
Pagdating sa trust rating, bumaba ito sa 25% noong Marso, kumpara sa 42% noong Pebrero.
Lumitaw na survey na mayorya sa mga Pinoy ang hindi nagtitiwala sa pangulo na 54%, kumpara sa 32% na nakuha niya noong Pebrero.
Samantala, si VP Duterte lang ang nakapagtala ng pag-angat sa performance ratings sa mga pangunahing lider ng bansa nitong Marso.
Mula sa 52% performance ratings na nakuha niya noong Pebrero, umangat ito sa 59%. Ang disapproval rating nito na 26% noong Pebrero, bumaba sa 16% nitong Marso.
Umangat ang approval rating ni Duterte sa NCR (+22), sumunod ang Visayas (+17), Balanced Luzon (+5), at Mindanao (+3).
Walong puntos din ang nadagdag sa trust rating ni Duterte na mula sa 53% noong Pebrero ay umangat sa 61% nitong Marso.
Samantala, bumaba rin ang trust at performance ratings nina Senate President Francis “Chiz” Escudero at Speaker Martin Romualdez nitong Marso.
Ayon sa Pulse Asia, natapyasan ng 8% ang approval rating ni Escudero (39%) at tumaas ng 6% ang kaniyang disapproval rating (18%).
Ang nagtitiwala kay Escudero, nasa 38% nitong Marso mula sa 47% na nakuha niya noong Pebrero.
Habang ang mga walang tiwala sa kaniya, naging 20% mula sa dating 14%.
Hindi naman umano nagbago ang approval rating ni Romualdez pero tumaas ng 14% ang kaniyang disapproval rating sa 54% nitong Marso.
Samantalang nasa 57% naman ang mga walang tiwala kay Romualdez, na mas mataas ng 15% noong Pebrero.
Hinihintay pa ng GMA News Online ang komento ng mga naturang pinuno ng bansa kaugnay sa resulta ng nasabing survey.
Ginawa ang survey noong Marso 23 hanggang 29, 2025, na may 2,400 adult Filipinos respondents sa face-to-face interview.
Mayroon itong error margin na ±2% para sa buong bansa; habang ±6 naman para sar NCR; ±5 sa Visayas; at ±4% sa Northern/ Central Luzon, Southern Luzon, at Mindanao, na may 95% confidence level.—FRJ, GMA Integrated News
