Kinumpirma ng Senado nitong Huwebes na na-“defaced” o pinalitan ang hitsura ng kanilang website. Isang grupo ng mga hacker umano ang umangkin na sila ang may kagagawan.

Sa isang pahayag, sinabi ng Senado na naglunsad na ito ng imbestigasyon sa insidente.

"Upon detection of the incident, our technical team immediately initiated security protocols, contained the issue, and commenced a comprehensive investigation to determine the cause and extent of the unauthorized activity," sabi nito.

"Additional security measures are also being implemented to prevent similar incidents from occurring in the future," dagdag pa ng mataas na kapulungan.

Ayon sa Senado, ipinakita sa paunang pagsisiyasat na walang sensitibong impormasyon na nakompromiso sa pag-atake.

"The website primarily contains publicly available documents and informational materials intended for public access," sabi nila.

"We assure the public that protecting the integrity and availability of our systems remains a top priority. We continue to closely monitor the situation and will provide updates as necessary," dagdag pa ng Senado.

Isang uri ng cyberattack ang defacement, na binabago ng mga hacktivist ang hitsura o nilalaman ng isang website, ayon sa Canadian Centre for Cybersecurity.

Sa Facebook, isang grupo na tinatawag na Nullsec Philippines ang umako ng responsibilidad para sa defacement at nagbabala na "minamatyagan" nila ang Senado.

"The Filipino people entrusted you with power, responsibility, and the duty to serve the nation-not personal interests, political dynasties, or corrupt networks," anang grupo.
"Every peso lost to corruption is a meal taken from a family, a classroom left unfinished, and a future denied," dagdag nila.

Nanawagan din ang organisasyon para sa higit na transparency at pananagutan sa gobyerno.

"To those who serve with integrity, continue your work. To those who abuse the public's trust, know that citizens are paying attention. The people deserve the truth," dagdag nila.

Huwebes bago magtanghali, sinalubong ang mga bumibisita sa website ng Senado ng isang mensahe na sumasailalim sa maintenance ang portal, at maaari silang muling bumalik.

Kasalukuyang pinagbabawalan ang mga bisita na pumasok sa Senado habang nasa work-from-home (WFH) arrangement ang mga empleyado nito mula Hunyo 10 hanggang 11, 2026 sa gitna ng pinaigting na mga hakbang sa seguridad dahil sa umano'y banta sa seguridad. – Jamil Santos/FRJ GMA News