Max Collins at Charlie Fleming, may ibinunyag tungkol sa kanilang mga karakter sa 'The Master Cutter'

Nagbahagi ng ilang detalye sina Max Collins at Charlie Fleming tungkol sa kanilang mga karakter sa GMA Prime Series na “The Master Cutter.”

Sa ulat ni Aubrey Carampel sa Balitanghali nitong Huwebes, sinabing ipinakilala na ang isa pang karakter ni Max na si Audrey Regalia, mula sa unang nakilala niyang karakter na si Elaine.

Ayon kay Max, isa ito sa mga plot twist ng kaniyang role. Dapat ding abangan kung muli silang magkikita ng karakter ni Dingdong Dantes na si Atoy.

Si Charlie naman, natutuwa sa kaniyang role na si Karla.

Nagpasalamat ang dalawa sa natanggap na positive reviews ng programa.

“When I get to my character, my complete body changes. You know what I mean? How I talk to other people changes. My accent is completely gone. I'm Tagalog and me, I'm just a different person,” sabi ni Charlie.

“Before, hindi ko maipaliwanag ‘yung character ko kasi secret pa noon that I'm in the Regalia family. So my dad is a kaaway ni Atoy. So parang maraming lumabas this week,” sabi ni Max.

Napanonood ang The Master Cutter Lunes hanggang Biyernes, 8 p.m. sa GMA Network. —Jamil Santos/VBL GMA News