Umatras si Michelle Dee sa nalalapit na Miss Grand International (MGI) All Stars competition matapos ang kaniyang emergency appendectomy.
Sa isang pahayag nitong Sabado, kinumpirma ng Sparkle GMA Artist Center na hindi na sasalang si Michelle sa pageant kasunod ng naunang post ng MGI All Stars tungkol sa kaniyang pag-atras sa kompetisyon.
"Sparkle GMA Artist Center confirms the post of Miss Grand International All Stars 2026 regarding Michelle Marquez Dee's official withdrawal from the competition," saad ng Sparkle.
"Following her recent emergency appendectomy and after careful consultation with her doctors, her family, and Sparkle, the decision was made to put her health first."
Dagdag pa ng Sparkle, nagsikap si Michelle para maghanda sa MGI All Stars, kaya naman "not an easy decision, but it is the right one" ang kaniyang pag-atras sa kompetisyon.
Pinasalamatan din ng Sparkle ang lahat ng tagahanga ni Michelle sa kanilang pag-unawa at umaasa sa kagayang suporta sa mga susunod niyang ganap.
"Sparkle GMA Artist Center remains fully behind Michelle, and we look forward to seeing her back at full strength."
Noong Huwebes, naglabas ang MGI All Stars ng update sa patuloy nitong online activity para sa isang exclusive dinner kasama ang pangulo ng MGI na si Nawat Itsaragrisil.
Kabilang si Michelle sa mga nangungunang kandidato sa social media voting category.
Gayunpaman, kinumpirma ng organisasyon ang kaniyang pag-atras sa kompetisyon habang pinahihintulutan ang kaniyang mga tagasuporta na patuloy na bumoto para sa kaniya hanggang sa matapos ang aktibidad.
“Although Michelle Dee from the Philippines has withdrawn, we would still like to honor her place in this voting activity until it concludes. This allows Filipino supporters to continue showing their support and sending her encouragement throughout the campaign,” sabi ng MGI All Stars.
Kamakailan lamang, isinugod si Michelle sa emergency room habang papunta sa trabaho. Kinailangan niyang sumailalim sa isang emergency appendectomy.
“I was advised by my medical team to strictly follow my recovery timeline. No prolonged strenuous abdominal activities. No heavy exertion. And most importantly, no pushing my body beyond what it can safely handle. Rushing this particular recovery (as I’ve done in the past) could lead to long-term complications which I cannot afford,” sabi niya.
Nauna nang inanunsyo ni Michelle ang kaniyang pagsali sa MGI All Stars sa premiere night ng "Red Crown."
Bukod kay Michelle, inanunsyo rin sina Anne Patricia Diaz at Alexie Caimoso Brooks bilang mga kinatawan ng Pilipinas sa patimpalak.
Nakatakdang magsimula ang ikalawang edisyon ng MGI All Stars sa Nobyembre 29 sa MGI Hall sa Bangkok, Thailand. Magaganap ang final competition sa Disyembre 12. —Jamil Santos/VBL GMA News

