Isa nang ganap na Kapuso ang aktres at cosplayer na si Myrtle Sarrosa. Ang hilig daw niya sa pagko-cosplay, nagsimula dahil sa panonood niya ng mga anime sa GMA.
Sa Chika Minute report ni Lhar Santiago sa GMA News "24 Oras" nitong Biyernes, sinabing nagustuhan ni Myrtle ang pagko-cosplay noong bata pa siya at nanonood ng mga anime sa Kapuso Network,
Aniya, matagal na niyang gustong maging isang Kapuso.
"Nag-audition ako late last year sa GMA Artist Center. Actually two years ago, I already auditioned for them pero parang naging proper time for me to really decide to step out of my comfort zone when I auditioned last year," ani Myrtle.
Matapos pumirma bilang Kapuso, excited na inanusnyo ni Myrtle na mapapanood na kaagad siya sa ilang Kapuso shows.
"First day ko pa lang sa GMA, meron na agad silang binigay sa akin na mga show, na binigyan nila ako agad ng opportunity to really showcase my talent. Kaya I feel the really warm welcome dito," sabi pa ng aktres.
Isinabay ni Myrtle ang showbiz at kaniyang pag-aaral ng kursong Bachelor of Arts in Broadcast Communication sa University of the Philippines-Diliman. Kahit working student, nakapagtapos siya ng cum laude.
Inilahad ni Myrtle ang Kapuso star na gusto niyang makatrabaho, tulad ni Alden Richards.
"Nakikita ko rin kasi siya na naglalaro ng isang video game din. so, si Alden Richards. 'Pag nakikita ko siya do'n, sabi ko, 'Grabe naman 'tong artistang 'to, kahit sobrang busy niyang tao, meron pa rin siyang time para mag-enjoy ng sarili niya.' And of course napaka-talented niya bilang isang aktor."
Natutuwa at nagpapasalamat naman ang aktres sa bago niyang tahanan na GMA Network matapos siyang pumirma ng kontrata sa GMA Artist Center.
Present sa contract singing sina Senior Assistant Vice President for Alternative Productions Gigi Santiago-Lara at GMA Artist Center Senior Talent Manager Daryl Zamora.-- Jamil Santos/FRJ, GMA News
