Hindi napigilan ni Baeby Baste na maging emosyonal nang makausap sa pamamagitan ng video si Vic Sotto na matagal na niyang hindi nakikita nang personal dahil sa COVID-19 pandemic.
Sa kaniyang Instagram account, ibinahagi ni Baste ang ilang larawan at video na kausap si Bossing at pati na si Talitha.
"Yung naiyak ka dahil na miss mo sila [nang] sobra lalo po si Bossing," saad niya sa caption at naka-tag si Pauleen Luna-Sotto.
"Bossing, we miss you," sabi ni Baste sa video na umiiyak.
Nagkomento naman si Pauleen sa post na, "Wawa man dodong."
Bilang bahagi ng COVID-19 protocols, ipinagbabawal ang mga kabataang edad 15 pababa na lumabas ng bahay.—FRJ, GMA News
