Inirekomenda ng US Food and Drug Administration sa kanilang health workers na huwag gamitin ang depektibong heringgilya na galing sa isang Chinese firm na kasama sa pagtuturok ng COVID-19 vaccine. Kabilang sa problema--naiiwan ang karayom sa taong tinurukan.
Sa ulat ng Reuters, sinabi ng tagapagsalita ng US-FDA na itinigil na ang pagpapapadala ng heringgilya na kasama sa COVID-19 vaccination kits noong Marso 22.
Gayunman, naniniwala ang ahensiya na hindi makakaapekto ang pagtigil ng pagpapadala ng naturang gamit sa isinasagawang pagbabakuna.
Ang naturang heringgilya at maging ang karayom ay produkto ng Chinese medical device maker na Guangdong Haiou Medical Apparatus Co (HAIOU).
Ayon sa isang pharmacist na nakausap ng Reuters, ang hiringgilya ay ipinadala para gamitin sa Pfizer Inc /BioNTech SE COVID-19 vaccine.
Batay umano sa nakuhang impormasyon ng US-FDA, may problema sa kalidad ng heringgilya. Mayroon umanong mga heringgilya na nakakalas ang karayom pagkatapos iturok sa pasyente at naiiwan ang karayom sa braso.
Mayroon din umanong mga healthcare worker na aksidenteng natutusok ng karayom nito.
Ang naturang heringgilya na inirekomenda ng ahensiya na huwag gamitin "until further notice" ay ang HAIOU's syringe-needle combinations - 1mL syringe with 25Gx 1-inch needle at ang 1mL syringe with 23G x 1-inch needle.
Ayon kay Erin Fox, senior director ng drug information sa University of Utah Health, nakatanggap sila ng naturang heringgilya na kasama ng Pfizer/BioNTech vaccine na bahagi ng ancillary supply kits mula sa McKesson Corp.
Ginamit umano nila ang heringgilya noong Marso pero hindi naman nabanggit sa ulat kung nagkaroon ng problema. Ngayon ay hindi daw ito nagagamit.
Naglabas ang US-FDA ng import alert noong Abril 30, para pigilan ang pagpasok sa Amerika ng naturang heringgilya at karayom.-- Reuters/FRJ, GMA News