Anim na bangkay ang nakuha ng search and rescue teams mula sa helicopter ng Philippine Air Force (PAF) na bumagsak sa Agusan del Sur nitong Martes na tutulong sana sa mga biktima ng bagyong "Tino."
“The search and rescue operations have led to the recovery of six bodies believed to be those of the pilot and crew members of the ill-fated Super Huey helicopter,” saad sa Facebook post ng Armed Forces of the Philippines’ Eastern Mindanao Command.
“The identities of the fatalities are being withheld pending notification of their respective families,” dagdag nito.
Kaagad din na binantayan ng mga sundalo mula sa 60th Infantry Battalion sa ilalim ng 1001st Infantry Brigade at 10th Infantry Division ng Philippine Army ang lugar na pinagbagsakan ng helicopter upang matiyak ang seguridad ng paligid.
Nagpahayag din ng buong suporta ang Philippine Army sa PAF sa isinasagawang imbestigasyon hinggil sa nangyaring insidente.
Ayon sa ulat, nagsasagawa ng humanitarian operations ang chopper para sa mga komunidad na naapektuhan ng Bagyong Tino nang bumagsak ito sa paligid ng Loreto, Agusan del Sur.
Una nang sinabi ng PAF na nawala ang komunikasyon sa Super Huey helicopter, na dahilan para kaagad silang magsagawa ng search and rescue operation.— mula sa ulat ni Mariel Celine Serquina/FRJ GMA Integrated News
