Idinadaan na lang ni Lovely Abella sa ngiti ang pagkansela ng kaniyang kasal sa fiancé na si Benj Manalo sa Enero 2021 dahil sa COVID-19 pandemic.
Sa Chika Minute report ni Nelson Canlas sa GMA News "24 Oras" sinabing naging malaking bagay ang pagsuporta ng close friends ni Lovely na sina Chariz Solomon at Valeen Montenegro para hindi niya ikalungkot ang wedding postponement.
"Actually mas nakatipid talaga ngayong quarantine dahil siyempre ang bisita mo limited. Kaya lang dahil din sa quarantine, nagastos din namin 'yung budget pang-wedding," natatawang kuwento ni Lovely.
Na-engaged sina Lovely at Benj Hunyo ng nakaraang taon.
Samantala, isa na ring ganap na fitness instructor si Lovely matapos ituloy ang pag-aaral niya online habang naka-quarantine.
"Isipin mo sa pag-aaral kong 'yon medyo natuyot 'yung utak ko kasi kailangan mo palang pag-aralan ang nerves, ang brains, ang joints, ang respiratory, ang heart. So iba-iba pala ang function nu'n every time na nagwo-workout tayo. Dapat pala inaalam 'yun talaga," sabi ni Lovely.
"Mas marami akong natutunan, at the same time medyo pinagkakakitaan ko na rin siya this time," dagdag pa niya. —LBG, GMA News