Naging emosyonal ang pamilya Legaspi nang magpaalam si Mavy sa kaniyang mga magulang na sina Carmina at Zoren para sa kaniyang lock-in taping.
Sa Instagram nitong Lunes, ibinahagi ni Carmina ang video at mga larawan habang iniiyakan niya at mahigpit na niyayakap ang anak.
"All grown up. Time for you to spread your wings my forever baby boy Mavy. Always remember that we are here for you and we are all proud of you!" saad ng aktres sa caption.
"Enjoy! I miss you already. First time kang malalayo sa amin. We love you," patuloy niya.
Nag-post din si Zoren ng larawan habang yakap ang anak.
"It's hard to let this guy go to spread his wings. Come back with wider and longer wing span. Always pray at night and when you wake up," ayon sa aktor.
"I love You as my son as my friend," sabi pa niya.
Nitong nakaraang buwan nang makompirma na kasama si Mavy sa upcoming series na "I Left My Heart in Sorsogon," na pagbibidahan ni Heart Evangelista.
Noong Pebrero, matatandaan na binisita nina Zoren, Carmina at Mavy ang kakambal niyang si Cassy nang sumabak sa lock-in taping ang dalaga sa katatapos lang na GMA series na "First Yaya." —FRJ, GMA News