Naging magka-love team noon sa youth-oriented show na "T.G.I.S.," maituturing ni Angelu De Leon na more than friends pero less than lovers ang relasyon niya kay Bobby Andrews.
Sa "Surprise Guest with Pia Arcangel," muling inihayag ni Angelu na ilan sa kaniyang mga naging karelasyon sa T.G.I.S. ay sina Michael Flores at Onemig Bondoc.
"Sabihin na nga nating si Bobby lang ang hindi ko nakatuluyan," sabi ni Angelu. "Kasi at that time talaga, meron kaming age difference, at medyo malayo."
Dahil sa agwat ng kanilang mga edad, nakababatang kapatid daw ang turing ni Bobby kay Angelu.
"Si Bobby, he's really just a gentleman kaya feeling niya, baby na baby ako sa paningin niya, little sister. Kaya walang romantic love."
Mataas ang respeto nila sa isa't isa, kaya nalagpasan nila ang level ng pagiging magkaibigan.
Dahil dito, hindi na raw kailangan pang lagyan ng label ang pagkakaibigan nina Angelu at Bobby.
"Pero sabi ko nga as always, my high respect for him. Kaya parang nag-supersede kami roon sa friendship level compared to the others. Kasi nga 'yung self-respect namin sa isa't isa ibang klase, kaya nga kami nagkaroon talaga 'yung saying na 'more than friends but less of a lover,' kasi andoon kami sa, 'yung mahal namin ang isa't isa because we respect each other so much, na to the point na hindi siya kailangan lagyan ng label, hindi siya kailangan romantic para maging authentic," sabi ni Angelu.
"Kaya when you see us together, hindi mo ma-explain 'yung chemistry kasi nga you know, it supersedes that relationship status na kailangan mag-jowa kayo or kailangan romantic kayo, 'yun 'yung level of relationship namin ni Bobby. Sabi nga namin baka soulmates kami, in that sense 'di ba?" —VBL, GMA News
