Nagbahagi si Jerry Yan ng kaniyang taos-pusong mensahe para sa kaniyang Meteor Garden co-star na si Barbie Hsu, na pumanaw sa edad 48.
Sa kaniyang post sa Weibo, inihayag ni Jerry ang kaniyang pasasalamat kay Barbie.
“Thankful for meeting you. In your carefree, childlike years, you always say, treat every day as your last. Have a great time. I hope you walk slowly this time. From now on, in another world, there will be no worries and the years will be peaceful,” saad ni Jerry, base sa translation sa English ng Google.
Si Jerry ang gumanap bilang ang F4 leader na si Dao Ming Si sa hit Taiwanese drama series na “Meteor Garden” noong 2001. Siya ang love interest ng karakter ni Barbie na si Shan Cai.
Bahagi rin si Jerry ng Taiwanese boy band na F4, kasama sina Vic Chou, Ken Chu, at Vanness Wu na co-stars din nila ni Barbie sa "Meteor Garden."
Nakiramay din si Ken, na gumanap naman bilang si Xi Men, sa pamamagitan ng pag-post ng isang larawan na puro itim lamang ang makikita.
Nag-post din siya ng throwback photo ng cast ng Meteor Garden kasama sina Barbie, Jerry, Vic, at Vanness.
Nagdalamhati rin si Rainie Yang, na gumanap bilang best friend ni Shan Cai sa Meteor Garden.
Sa kaniyang Instagram story, nag-post si Rainie ng isang black photo na may kasamang maikling mensahe.
“Xiyuan, thank you. I will miss you forever and love you," saad ni Rainie sa Chinese, na salin sa English ng Google.
Xiyuan ang birth name ni Barbie.
Gumanap si Rainie bilang si Xiao You, at ang love interest ni Xi Men.
Pumanaw si Barbie dahil sa pneumonia.
Sa ulat ng Balitanghali nitong Martes, sinabi ng kapatid ni Barbie na nagbabakasyon ang kanilang pamilya sa Japan nang makaranas ng flu si Barbie na humantong sa pneumonia.
Naulila ni Barbie ang kaniyang asawang si DJ Koo na isang South Korean musician, at ang dalawa niyang anak sa dating asawang si Wang Xiao Fei, na humantong sa divorce noong 2021. — Jamil Santos/BAP, GMA Integrated News