May madamdaming mensahe ng pamamaalam si Jerry Yan para sa yumaong si Barbie Hsu, na ka-love team niya noon sa sikat nilang TV series na “Meteor Garden.”
Sa kaniyang post, nagpasalamat ang Taiwanese actor na nakilala niya si Barbie.
“Thankful for meeting you. In your carefree, childlike years, you always say, treat every day as your last. Have a great time. I hope you walk slowly this time," saad ni Jerry.
"From now on, in another world, there will be no worries and the years will be peaceful,” patuloy niya.
Kinumpirma ng kapatid ni Barbie ang pagpanaw ng 48-anyos na aktres nitong Feb. 3 dahil sa pneumonia.
Sumikat noong 2001 ang Taiwanese drama na “Meteor Garden," kung saan gumanap si Jerry bilang si Dao Ming Si, na lider ng grupong "F4."
Ka-love team niya si Barbie na gumaganap na si Shan Cai.
Kasama nila sa series sina Vic Chou, Ken Chu, at Vanness Wu.
Ikinalungkot din ng fans ng “Meteor Garden" ang pagpanaw ni Barbie, na karamihan ay mga estudyante pa lang noon.
Naulila ni Barbie ang kaniyang mister na South Korean musician na si DJ Koo, dalawang anak na edad 10 at walo, mula sa dati niyang asawa na si Wang Xiao Fei.-- FRJ, GMA Integrated News