Nagpositibo sa coronavirus disease 2019 (COVID-19) ang isang kinatawan ng Pilipinas sa United Nation sa New York. Ayon kay Foreign Affairs Secretary Teodoro Locsin Jr., nasa maayos naman siyang kalagayan.
Ayon kay Locsin, nakausap niya si Philippines acting UN Ambassador Kira Azucena, at sinabi nito na binabantayan ng doktor ang pasyenteng diplomat.
"The infected is doing well; she's young, spritely, smart and taking some doctor prescribed meds. Thank you. I just talked to Kira," saad ni Locsin kaniyang Twitter post.
The infected is doing well; she's young, spritely, smart and taking some doctor prescribed meds. Thank you. I just talked to Kira. https://t.co/lwb8VWtDz8
— Teddy Locsin Jr. (@teddyboylocsin) March 13, 2020
Sa isang pahayag, sinabi ni Azucena, pinayuhan sila ng the New York City health department na "mag-self-quarantine."
Naka-lockdown din umano ang Philippine Center sa New York na kinaroroonan ng Philippine Mission.
Ayon kay Locsin, ipinagdiwang kamakailan ng pasyenteng diplomat ang kaniyang kaarawan sa Florida kasama ang mga kaibigan.
"It was after celebrating her birthday with friends during a light rain and she'd just come from Florida," anang kalihim.
It was after celebrating her birthday with friends during a light rain and she'd just come from Florida. https://t.co/uhXCNzYUuB
— Teddy Locsin Jr. (@teddyboylocsin) March 13, 2020
Sinabi naman ni Azucena na huling nagpunta sa UN headquarters ang pasyenteng diplomat noong Lunes at wala namang naramdamang masama sa katawan.
Pero kinabukasan, Martes, nakaranas na siya ng flu-like symptoms at nagpasuri sa doktor at doon na nadiskubre na positibo siya sa COVID-19.— FRJ, GMA News
