Isang pasaherong lalaki na naglabas ng kutsilyo at nanghabol ng mga awtoridad ang sugatan matapos siyang barilin ng isang pulis sa Iloilo International Airport.
Sa ulat ng Unang Balita nitong Huwebes, sinabing naganap ang insidente nitong Miyerkoles.
Lumabas sa inisyal na imbestigasyon na may namataang kutsilyo sa bag ng lalaking pasahero nang idaan ito sa scanner.
Dahil dito, inutusan ang lalaki na ilabas ang laman ng kaniyang bag, pero nag-iba umano ang kaniyang kilos at tila ayaw makipagtulungan.
Nang inalabas na niya ang kutsilyo, hinabol umano ng lalaki ang isa sa mga pulis, at doon na rin siya nabaril ng pulis.
Dinala sa ospital ang pasaherong lalaki.
Batay sa pahayag ng Department of Transportation's Office for Transportation Security (OTS), tinamaan sa dibdib ang lalaki.
“Personnel of the Philippine National Police promptly intervened and undertook appropriate action to prevent possible injury to surrounding passengers and airport personnel. In the course of this response, the passenger was shot in the chest. He was subsequently brought to the hospital for medical attention,” anang OTS.
“The incident is currently the subject of further investigation by the OTS, in coordination with airport authorities and law enforcement agencies,” dagdag nito. —Jamil Santos/VBL GMA Integrated News
