Nangungulila ang isang pamilya sa Pilipinas dahil sa pagkawala ng kanilang padre de pamilya na seafarer makaraang atakihin ng Iran ang sinasakyan nitong tugboat sa Strait of Hormuz. Isa lang siya sa maraming marinong Pinoy na mistulang nasa “war zone” bunga ng patuloy na kaguluhan sa Middle East.
Sa nakaraang episode ng “Kapuso Mo, Jessica Soho,” ipinakilala si George Miranda, na magsa-10 taon nang seafarer sa Dubai at isa sa mga naipit sa Strait of Hormuz, na daanan ng mga barko na may kargang langis o grudo na galing sa Middle East.
Ayon kay Ledi Roma Mae Veneracion, pinsan ni George, nag-chat pa siya rito at tumugon si George na maayos pa ang kondisyon nito noong Marso 1.
Marso 5 nang ibalita ni George na mayroon umano silang operasyon na gagawin sa United Arab Emirates.
Pagsapit ng 7 p.m. nakapag-abiso pa siya sa pamilya sa kanilang lokasyon na malapit sa Iran sakay ng tugboat na Mussafah 2. Nakapagpadala pa ng larawan si George bago tuluyang mawalan ng signal.
Sa litratong kaniyang ipinadala, makikitang nasa loob si George ng tugboat, kasama ang lima pang ibang seafarers.
Hanggang sa Marso 6 nang kontakin na ang pamilya ni George ng pinagtatrabahuhan niyang kompanya na “missing” na ang Pinoy seafarer.
Doon na lamang din nila nalaman na ang pangkat ni George, ipinadala umano ng kanilang kompanya upang tulungan ang container ship na Safeen Prestige na tinamaan ng missiles at na-stranded sa mismong Strait of Hormuz.
Noong mga oras na iyon, peligroso ang lugar dulot ng mga pinapakawang missiles at drones.
“Daddy, sabi mo tawag mo ako. Hindi mo ba ako family? Hindi mo nitawag me,” sabi ng pitong taong gulang anak ni George na si Georgie, na sa murang edad ay apektado na sa pagkawala ng ama.
Nakausap pa ni George si Georgie sa huli nitong video message.
“Sorry, Georgie. Pa’no makaka-chat si Daddy? Ang la-laki ng alon. Tingnan mo 'yung buhok ni daddy, hindi nga ako nakapag-ayos. Sumuka na sila lahat. Ako, masakit na ulo. Kagigising lang ni Daddy, duty na naman ulit. Hindi pa kami nakakarating sa pupuntahan namin. Kaya pasensiya na, ha… nasa biyahe pa rin sina daddy, hanggang ngayon,” saad niya.
Idinadaan lamang ni Georgie ngayon sa pagdo-drawing ang pangungulila sa kaniyang daddy George.
“May dalawang missile pa, may dinrowing na barko, tapos 'yung family, sila, tapos 'yung daddy niya, nilagyan niya ng X. Ibig sabihin na wala nga, nawawala si daddy niya,” sabi ni Libranda Miranda, tita ni George.
“Kung nasaan man siya, sana ginagabayan siya ng Panginoon. At sana makita namin siya, siyempre. Kasi babawi kaming pamilya niya sa kaniya. Ayun na lang. Siyempre, mahal namin si kuya,” sabi ni Ledi.
“Sana si President Bongbong Marcos na ang magdesisyon kung ano ang magagawa niya na gusto ko lang na mapapabalik… si George, buhay man o patay. Gusto na namin siya makita,” sabi ni Libranda.
Sinubukan ng KMJS na kunan ng pahayag ang kompanya ni George na nakabase sa UAE pero hindi pa nakatanggap ng sagot mula sa kanila habang ginagawa ang ulat.
Sa ngayon, isa sa bawat apat na marino sa buong mundo ay Pinoy. At marami sa mga Pinoy marino ang nadedestino sa Middle East at dumaraan sa napakakipot na Strait of Hormuz, na nasa pagitan ng Iran sa hilaga, Oman at United Arab Emirates naman sa timog.
Sa Strait of Hormuz din dumadaan ang mga barko mula Iraq, Kuwait, Qatar, Saudi Arabia at Bahrain.
Dahil kontrolado ng Iran ang Strait of Hormuz, kung saan dumadaan ang malaking supply ng langis sa buong mundo, halos buong mundo ang mapaparalisa kapag isinara ito.
Bago ang giyera sa Middle East, nasa 144 na mga barko ang dumadaan sa Strait of Hormuz araw-araw.
Tunghayan sa ulat na ito ng “KMJS” ang mga kuwento ng iba pang marinong Pinoy na nakakasaksi sa matinding sigalot sa Gulf region. Panoorin, -- FRJ GMA Integrated News
