Iminungkahi ni Valenzuela City Representative Wes Gatchalian sa Department of Transportation (DOTr) na ipagpaliban ang full implementation ng cashless toll collection sa mga expressway dahil na rin sa mga problema sa radio-frequency identification o RFID system.

Sa isang pahayag nitong Miyerkules, sinabi ni Gatchalian na isa sa mga dapat ikonsidera ay ang hindi pa pagiging "interoperable" ng dalawang uri ng RFID na Easytrip at Autosweep.

"It puzzles me why the DOTr decided to implement a cashless toll collection scheme when Easytrip and Autosweep are not yet compatible with each other's tollway system," anang mambabatas.

“Since the government targets to have full interoperability by next year anyway, then we should also consider delaying the implementation of the cashless toll collection until next year,” dagdag pa niya.

Ang tinutukoy ni Gatchalian ay ang paggamit ng Easytrip at Autosweep para sa iba't ibang expressway.

Ang Autosweep tags na mula sa San Miguel Corporation (SMC) ay ginagamit sa Skyway, South Luzon expressway (SLEx), STAR Tollway, Tarlac–Pangasinan–La Union Expressway (TPLEx), Ninoy Aquino International Airport Expressway (NAIAx), at Muntinlupa-Cavite Expressway (MCX).

Habang ang Easytrip naman ng Metro Pacific Tollways Corporation (MPTC) ay para sa North Luzon Expressway (NLEx), Subic-Clark-Tarlac Expressway (SCTEx), Cavite Expressway (CAVITEx), C5 Southlink, at Cavite-Laguna Expressway (CALAX).

Dahil hindi pa mababasa sa mga scanner sa toll ang dalawang RFID tags, lilitaw na dalawang RFID ang kailangang ipalalagay ng mga motorista kung dumadaan siya sa mga expressway ng SMC at MPTC.

Nitong nakaraang linggo, inihayag ng DOTr na iuurong nila sa December 1 ang full implementation ng cashless toll collections sa halip na sa November 2.

Ang pag-urong ng petsa ay bunga umano ng mga kahilingan ng mga motorista na hindi pa nakapagpapalagay ng RFID sticker o tag.

Pero ayon kay Gatchalian, magdudulot lamang ng problema sa mga motorista ang full cashless payment scheme kung wala pa ring "interoperability" ang dalawang uri ng RFID.

“While we fully support the shift to cashless transaction to lessen physical contact to contain the spread of COVID-19, the move should have been carefully planned and coordinated by the two toll operators to ease the burden of consumers to apply for and load up two different RFID cards,” giit niya.

Dagdag pa ng mambabatas, dagdag gastusin din sa mga motorista ang dalawang RFID tags na kailangan pondohan ng "load" ang mga card.

Ayon pa kay Gatchalian, marami ring motorista ang hindi pa makapagpakabit ng RFID lalo na ang mga nasa malalayong lugar.

“It’s not easy for those who live outside of Metro Manila and far from the expressways to have to drive to an installation booth and get an RFID," saad niya.

"We have to consider safety precautions because of the coronavirus pandemic plus not everyone has the time to go to an installation site,” dagdag pa ng kongresista.

Bukod sa layuning mapabilis ang daloy ng mga sasakyan sa toll, nais ng DOTr na ipatupad ang full cashless transactions upang maiwasan din ang pasahan ng COVID-19 virus sa pagbabayad ng cash sa toll.—FRJ, GMA News