Nakipagkuwentuhan, tawanan at kulitan ang mga Kapuso artists kay GMA Senior Vice President Atty. Annette Gozon-Valdes na pag-welcome sa kaniya bilang bagong pinuno ng Sparkle.
Sa Chika Minute report ni Aubrey Carampel sa GMA News "24 Oras" nitong Biyernes, sinabing naging casual ang pagkikita ng Sparkle stars at ni Atty. Annette sa pag-welcome sa kaniya sa Sparkle family.
Dumalo rin sina Senior Assistant Vice President for Alternative Productions Gigi Santiago-Lara, Assistant Vice President for Talent Development and Management Joy Marcelo, at senior talent managers ng Sparkle.
"I want to get to know them even more, of course, para ma-guide ko sila sa career nila and I want to know more about their personal lives para kung meron silang kailangan sa amin. Because it's not just their career, we want to be able to help them sa lahat ng aspects ng buhay nila," sabi ni Atty. Annette.
Nagpunta sa okasyon si Zoren Legaspi kasama ang kaniyang kambal na mga anak na sina Mavy at Cassy.
"Si Miss Gigi, she's been very nice to us. Kay Cassy, kay Mavy, laging may guidance. Si Miss Annette naman, for the longest time, naging kaibigan na namin si Miss A. (Annette)," sabi ni Zoren.
Tila instant reunion din ito ng cast ng "Encantadia," dahil present ang original Mira na si Yasmien Kurdi, at Encantadia 2016 Amihan at Ybarro na sina Kylie Padilla at Ruru Madrid, at si Hitano na si Pancho Magno.
"Happy kami sa transition, at least 'di ba, it's something new at exciting," sabi ni Yasmien.
"Sana mas mapadalas 'yung ganito, kasi magkakaroon ng magandang relationships," sabi ni Kylie.
"At least makapag-unwind din," sabi naman ni Pancho.
"Nag-set ng night for us na mag-get-together and mag-enjoy lang," sabi ni Ruru.
Muli namang nagkita ang "Kambal, Karibal" stars na sina Kyline Alcantara at Pauline Mendoza.
Present din sina Rayver at Rodjun Cruz, at mag-amang Benjie at Andre Paras.
"Mas excited pa ako mas maka-bond siya and siyempre maka-work pa natin siya," sabi ni Rodjun.
"Masaya dahil nakikita natin na family 'yung trato," sabi ni Benjie.
"May extended family pa kami rito, which is I'm very thankful about," sabi ni Andre.
Nauna rito, sinorpresa na rin ni Alden Richards ang Sparkle bosses, na dumiretso sa dinner bonding pagkagaling sa US.
Dumalo rin doon ang iba pang Sparkle stars.--Jamil Santos/FRJ, GMA News