Nais ni Deputy Speaker at Basilan Representative Mujiv Hataman na magkaroon ng congressional midterm review sa Bangsamoro transition sa harap ng mungkahi na palawigin ito sa 2025 at huwag munang magkaroon ng halalan sa 2022.

Sa isang pahayag nitong Biyernes, sinabi ni Hataman, na maghahain siya ng resolusyon sa Kamara de Representantes upang hilingin sa kinauukulang komite na magsagawa ng midterm review sa mga nagawa na at plano pang gawin ng interim government ng Bangsamoro Autonomous Region in Muslim Mindanao (BARMM).

Sa ilalim ng Bangsamoro Organic Law (BOL), ang Bangsamoro Transition Authority (BTA) ang magsisilbing interim government sa BARMM hanggang sa maisagawa ang paghalal ng mga opisyal sa 2022.

Pero inihayag kamakailan ng Office of the Presidential Adviser on the Peace Process (OPAPP), na hindi sapat ang tatlong taon na transition sa BARMM kaya iminumungkahi na palawigin pa ito sa 2025.

Ayon kay Hataman, kung palalawigin ang transition, dapat iprisenta ng mga namumuno ang kanilang plano sa autonomous region sa susunod na tatlo pang taon.

“Giving us a roadmap of the three-year extension will help us understand the urgency or the need to extend the BARMM transition period. This should include timelines for short- and long-term projects and programs,” paliwanag ni Hataman, dating gobernador ng ARMM na tinatawan na ngayong BARMM.

“But I think they cannot do this without an honest-to-goodness midterm review of gains, accomplishments and areas of improvements. Kaya gusto ko uli imungkahi sa Pangulo [Rodrigo Duterte] na magkaroon muna ng rebyu ang BARMM bago natin i-extend ang transition period. It is the only way we can assess what needs to be done and what we can do further,” dagdag pa ng mambabatas.

Sinabi pa ni Hataman na dapat din maging bahagi sa gagawing midterm review ang mga lokal na opisyal at mga sektor sa BARMM para makapaglatag ng mas mahusay na programa kung palalawigin ang panunungkulan ng mga kasalukuyang namamahala.

“We want to see what the proponents of the extension plan to do in the next five years, like what are the specific objectives for next year and the year after that, or what they intend to accomplish in terms of legislative and executive actions,” pahayag niya.

“We cannot simply extend the period without studying it. Did the pandemic interfere with the BARMM transition’s timelines? That is a valid reason. But we need to sit down and discuss it exhaustively,” sabi pa ni Hataman.--FRJ, GMA News