Inalmahan ng ilang senador ang pahayag ni Pangulong Rodrigo Duterte tungkol sa gagawing imbestigasyon ng kapulungan kaugnay sa pagturok ng hindi rehistradong COVID-19 vaccine sa ilang tauhan ng Presidential Security Group (PSG).
Sa televised briefing nitong Lunes ng gabi, nagbabala si Duterte sa Kongreso na huwag pilitang dumalo sa pagdinig ang mga tauhan ng PSG kaugnay sa kontrobersiyal na COVID-19 vaccines na hindi aprubado ng Food and Drug Administration (FDA).
Ayon kay Senador Panfilo Lacson, hindi dapat panghimasukan ng Palasyon ang trabaho ng Kongreso tungkol sa mga isinagawang pagdinig at mga ipatatawag na tao.
"Ibabalik natin sa Malacañang 'yung issue ng panghihimasok. Hindi rin dapat manghimasok 'yung Malacañang sa tungkulin ng Senado o Kongreso na kung kami'y mayroong pagdinig ay uubra naman kaming magpatawag ng resource persons," sabi ng senador sa panayam sa radyo nitong Martes.
"Pag tinawag naman nating resource persons 'di ibig sabihin mga suspek 'yun eh. Gusto lang natin maliwanagan at saka in aid of legislation 'yung pagdinig na isasagawa," dagdag niya.
Una rito, sinabi ni Senate President Vicente Sotto III na hindi naman ipatatawag ng Committee of the Whole ang PSG sa gagawing imbestigasyon sa vaccination plan ng gobyerno tungkol sa COVID-19.
Bagaman iminungkahi ni Senate Minority Leader Franklin Drilon, na dapat ipaliwanag ng PCG kung saan nila nakuha ang bakuna na itinuturing ilegal at ipinuslit sa bansa.
Pero babala ni Duterte, magkakagulo kapag pinuwersa ng mga mamababatas ang PSG na dumalo sa pagdinig ng Senado.
"That's unfortunate because I think he's wrong. The President has got to respect the separation of powers clause," sabi naman ni Sen. Richard Gordon sa hiwalay na panayam.
"I stand by the independence of Congress... No one can overwhelm the other and put it into submission in the same manner that we can't bully the executive and threaten them with investigations," sabi pa niya.
Ayon kay Sen. Risa Hontiveros, miyembro ng oposisyon, premature at out of place ang banta ni Duterte.
"The Senate is well within our rights, lalo na sa ganyang hearing ng Committee on the Whole, to invite resource persons to shed light on the issues that we will be inquiring into or investigating," anang senadora.
"Mayroon din kaming sariling rules tungkol sa pagsa-cite in contempt kung kinakailangan vis-a-vis resource persons who do not honor the senate’s invitation, or do not answer questions of members of the Senate in a forthright manner," sabi pa ni Hontiveros.
Ayon kay Drilon, hindi na maiimbitahan sa pagdinig ang PSG dahil ginamit ni Duterte ang kaniyang "executive privilege" sa ilalim ng Executive Order 464.— FRJ, GMA News
