Sapat na umano ang bilang ng mga kongresista na pumirma sa manifesto para muling ihalal na lider ng Kamara de Representantes si Leyte Congressman Martin Romualdez, ayon sa ilang lider ng kapulungan nitong Huwebes.

Inihayag ito nina House Assistant Majority Leaders Ernesto Dionisio ng Maynila at Zia Adiong ng Lanao del Sur, nang tanungin kung nanligaw pa ng suporta si Romualdez sa ginanap na orientation para sa mga bagong kongresista.

“Congress is a collegial body, there are already at least 283 who signed the manifesto. That [number] is an overwhelming majority in support of Speaker Martin Romualdez, and this manifesto shows a strong support in the leadership of Speaker Martin is supported by the House members and incoming 20th Congress,” sabi ni Dionisio sa mga mamamahayag.

Nang tanungin kung may iba pang malakas na aspirante bilang Speaker maliban kay Romualdez, sabi ni Dionisio, “Parang malabo.”

Una rito, hindi lumagda sa naturang manifesto si House Deputy Speaker at Cebu Rep. Duke Frasco kaya pinaalis siya sa kinaanibang National Unity Party (NUP), na sumusuporta kay Romualdez.

Kasunod nito, inihayag ni Frasco na kandidato niya sa pagiging Speaker si Navotas Rep. Toby Tiangco o si Negros Occidental Rep.-elect Albee Benitez.

Ayon kay Adiong, malaya ang mga kongresista na pumili ng gusto nilang maging lider.

"Wala pong pilitan rito," ani Adiong.

Gayunman, iginiit ni Adiong, na matibay at epektibo ang liderato ni Romualdez kaya dapat mapanatili.

“If it is not broken, why fix it?,” saad ni Adion.

Sinabi rin nina Adiong at Dinisio na hindi tinalakay ni Romualdez ang Speakership race sa ginanap na fellowship meeting sa mga bagong kongresista.

“The Speaker was there mainly to give guidance and show support to the new members of the House. Speaker Martin was simply guiding the new members on how they could become an effective leader of their respective districts. Wala pong napag-usapan doon about leadership support or anything about positions in the House [leadership],” sabi ni Dionisio.

Si Romualdez ay pinsan ni Pangulong Ferdinand Marcos, Jr. — mula sa ulat ni Llanesca T. Panti/FRJ, GMA Integrated News