Kasama sina dating senador Bong Revilla at dating kongresista na si Zaldy Co bilang mga respondent sa inihaing mga reklamo sa Department of Justice (DOJ), na may kinalaman sa mga “ghost” na flood control projects sa Bulacan, ayon kay Prosecutor General Richard “Dong” Fadullon nitong Biyernes.

Ayon kay Fadullon, kasama ang dalawa bilang “proponents.”

“Initially, those who were charged in those two cases only involved DPWH officials. Eventually, there were pieces of evidence submitted by the National Bureau of Investigation and this time included proponents,” sabi niya.

Nang tanungin kung sino ang mga karagdagang respondent, sinabi ni Fadullon na ito ay sina Revilla at Co.

Ayon kay Justice spokesperson Atty. Polo Martinez, idinagdag si Revilla sa reklamo na kinasasangkutan ng SYMS Construction.

Samantala, sinabi ni Fadullon na sa limang reklamo, tatlo na ang isinumite para sa resolusyon.

“So we’re just awaiting the resolution of the panel. We’re just expecting that to be out before the 15th of December,” sabi niya.

Humiling ng palugit

Ayon kay Fadullon, humingi si Revilla ng palugit sa paghahain ng kaniyang counter-affidavit.

“There’s a request for extension to file the counter-affidavit. So the panel will act accordingly… we just have to see and await the results of the preliminary investigation,” sabi niya.

Samantala, nagpahayag din siya ng pag-asa na matatapos pagsapit ng Disyembre 15 ang paunang imbestigasyon para sa natitirang dalawang reklamo.

Una nang iniharap ng DOJ ang rekomendasyon nito ng pagsasampa ng mga kasong graft, malversation, perjury at falsification of public documents laban sa mga opisyal ng Department of Public Works and Highways’ Bulacan First District Engineering Office at ilang mga kontratista sa Office of the Ombudsman.

Kalaunan, ibinalik ni Ombudsman Jesus Crispin Remulla ang impormasyon laban sa mga respondent at inatasan ang DOJ para sa pag-uusig sa mga kaso, kabilang ang pagsasagawa ng paunang imbestigasyon at ang pagsasampa ng mga kaso. – Joahna Lei Casilao/Jamil Santos/FRJ GMA Integrated News