Inutusan ng Korte Suprema ang pamahalaan na isauli sa Philippine Health Insurance Corporation (PhilHealth) ang P60 bilyong sobrang pondo na naunang inilipat sa national treasury. Para matiyak na maibabalik ang pondo, kasama sa utos ng mga mahistrado na isama ang naturang halaga sa 2026 General Appropriations Act (GAA).

Sa 136-pahinang desisyon, idineklara ng SC En Banc na walang bisa ang Special Provision 1(d), Chapter XLIII ng 2024 GAA, ang Finance Circular No. 003-2024, at ang paglilipat ng P60 bilyon dahil ipinatupad umano ang mga ito na may labis na pag-abuso sa kapangyarihan na katumbas ng kawalan o sobrang hurisdiksyon.

Pinahihintulutan ng naturang Special Provision 1(d) ang pagbabalik ng sobrang pondo ng mga government-owned o controlled corporations sa national treasury, habang inatasan naman ng circular ng Department of Finance (DOF) ang paglipat ng kabuuang P89.9 bilyon mula PhilHealth patungo sa national treasury.

Bilang pagtugon ng PhilHealth sa utos ng DOF, nauna na nitong inilipat sa national treasury ang P60 bilyon na bahagi ng P89.9 bilyon.

Dahil dito, inatasan ng SC ang Kongreso, ang Department of Finance, at ang Executive Secretary na isama ang P60 bilyon sa item sa 2026 GAA para matiyak na maibalik ang naturang halaga sa PhilHealth.

Samantala, ipinag-utos din ng SC na hindi na ilipat pa sa treasury ang nalalabing P29.9 bilyon ng PhilHealth.

“Filipinos deserve better. We deserve to dream, not of the day when we and our families can finally walk into the hospital without fearing financial ruin, but of the beautiful life that can still be led after healing,” saad sa desisyon.

“The Court will not sit idly by, not when the people look and cry to us for help, not when the Constitution charges us to be the singular indomitable bastion of our people’s rights. This Court will not be deaf to the pleas of our people. We will not be blind to their plight. And we certainly will not be callous to their agony,” dagdag nito.

Sa press conference, sinabi ni SC spokesperson Atty. Camille Ting na “immediately executory” ang naturang desisyon, o agad na dapat ipatupad.

Nilinaw din ni Ting na nagdesisyon ang SC na hindi umabuso si Marcos nang sertipikahan niyang urgent ang 2024 GAA. Tinanggihan din ng SC na alamin ang pananagutan ng Finance secretary para sa technical malversation at/o plunder, dahil sa ginawang pag-utos sa paglilipat ng nabanggit na pondo ng PhilHealth.

Si Ralph Recto noon ang kalihim ng DOF, na itinalaga na ngayon na Executive Secretary.

Sa isang pahayag, sinabi ni Recto na iginagalang nila ang desisyon ng SC.

“We reiterate that the Executive simply complied with the congressional mandate under the 2024 GAA, and that the Department of Finance’s (DOF) role is solely in revenue generation and debt and deficit management. We believed then, and still believe, that the directive was a common-sense approach to optimize government coffers without resorting to additional borrowing or new taxes,” ani Recto.

“Before any remittance occurred, the Office of the Government Corporate Counsel (OGCC), the Governance Commission for GOCCs (GCG), and the Commission on Audit (COA) gave DOF the green light to do so. The PhilHealth board also approved the transfer,” dagdag pa niya.

Sinabi naman ni Presidential Communications Secretary Dave Gomez, na susuriin ng Office of the Solicitor General ang desisyon ang pagkatapos ay saka gagawin ng susunod na hakbang, kasama na ang posibilidad na paghahain ng motion for reconsideration.— Joahna Lei Casilao/FRJ GMA Integrated News