Sinita ng Commission on Audit (COA) ang Social Security System (SSS) dahil sa pagbili nito ng 143,424 rolyo ng tissue paper na nagkakahalaga ng P13.195 milyon noong 2024. Ayon sa komisyon, nagpapakita umano ito ng palatandaan ng mahinang pagpaplano ng ahensiya.

Ayon sa ulat ni Maki Pulido sa GMA News “24 Oras” nitong Lunes, sinabi ng state auditors na ang bilang ng mga biniling tissue paper ay lampas sa kailangan ng SSS para sa dalawang buwang suplay.

Sa sobrang dami, hindi rin umano ito magkasya sa storage facilities ng ahensya.

“... That the supply exceeded the agency’s two-month requirement; and a total of 116,046 rolls remained at the supplier’s custody without any agreement due to lack of policy on procurement of supplies and equipment,” saad sa annual audit report ng COA sa SSS.

“Further verification with the supplier revealed that the arrangement with SSS was based solely on a verbal agreement, without any support documentation or formal memorandum of understanding,” dagdag nito.

Binanggit din ng audit body na hindi maayos na naplano ng SSS ang pagbili nito sa daan-daang libong rolyo ng tissue paper.

Ang halagang ginamit para bilhin ang 143,424 rolls ng tissue paper ay maaari na raw sanang napunta sa benepisyo ng 2,000 pensioners ng SSS o funeral benefits para sa 650 yumaong miyembro, ayon sa report.

Sa naturang audit report din, binanggit ng COA ang halos P3 milyon naman ang underpayment sa funeral benefits ng SSS.

“Deficiencies in the processing and payment of funeral benefits resulting in the underpayment of benefits by P2.833 million, potentially affecting the entitlements of surviving legal spouses of deceased members: Underpayment of P2.898 million for 293 out of 1,584 sampled claims due to incomplete computation of contributions,” saad ng COA.

Idinagdag pa ng COA na may ilang pensioners na pumanaw na ang patuloy na nakatatanggap ng pension benefits mula sa SSS, na nagresulta sa overpayment na P24.811 milyon.

“The overpayment of pension benefits to deceased pensioners amounting to P24.811 million highlights significant weaknesses in the SSS’ financial safeguards leading to loss and wastage of government funds while putting the viability of the pension fund at risk. Moreover, adequacy and effectiveness of mechanisms in place to monitor pension payments could not be ascertained,” ayon sa audit report.

Samantala, nagbigay din umano ang SSS ng cash incentives na hanggang P50,000 bawat isa sa 6,525 opisyal at empleyado, na may kabuuang P333 milyon sa ilalim ng Prestige Award.

Sinabi ng state auditors na ang monetary awards ay dapat ibigay lamang “when the suggestions, inventions, superior accomplishments and other personal efforts result in monetary savings which shall not exceed 20% of the savings generated.”

Dahil dito, inatasan ng COA ang SSS na magsumite ng evaluation report kung paano tinukoy ang cash incentives, at kung hindi, dapat ibalik ng SSS ang lahat ng “unsubstantiated” cash incentives.

Nakikipag-ugnayan ang GMA Integrated News sa SSS para sa kanilang komento tungkol sa mga natuklasan sa audit report ng COA.— FRJ GMA Integrated News